Alyaska yarim orolida AQSHning F-35A qiruvchi samolyoti qulab tushdi. Uchuvchi katapulta qilishga ulgurdi va tirik qoldi. Bu haqda Associated Press xabar berdi.
Hodisa 28-yanvar kuni sodir bo‘lgan. Polkovnik Pol Taunsendning ta’kidlashicha, qiruvchi samolyot harbiy havo kuchlarining Eylson bazasida mashg‘ulotlar o‘tayotgandi. Uchuvchi parvoz vaqtida favqulodda holat yuzaga kelganini e’lon qilgan. U katapulta qilishga ulgurgan va hozirda stabil holatda bo‘lib, tibbiy muassasada tekshiruvdan o‘tmoqda.
“Harbiy havo kuchlari shunga o‘xshash hodisalar takrorlanish ehtimolini minimallashtirish uchun sinchkovlik bilan tekshiruv o‘tkazadi”, deydi polkovnik.
Samolyot uch xil variantda ishlab chiqariladi: AQSH Harbiy-havo kuchlari uchun (yer qiruvchisi), AQSH dengiz piyodalari korpusi va Buyuk Britaniya harbiy-dengiz kuchlari uchun (qisqa masofada uchish va vertikal qo‘nish imkoniyatiga ega qiruvchi) hamda AQSH harbiy-dengiz kuchlari uchun (aviatashuvchi).
F-35 bir parvozda 12 soatdan ortiq havoda bo‘lishi mumkin. Bu bitta missiya doirasida Shimoliy yarim sharning deyarli istalgan nuqtasiga borish imkonini beradi.
F-35 qiruvchi samolyotlarining dunyoda qo‘llanilishi
15-yanvar kuni Norvegiyaning ikkita F-35 samolyoti Rossiyaning Ukrainaga raketa hujumi paytida Polsha havo hududini himoya qilish uchun ko‘tarilgan. NATO aviatsiyasining bunday parvozi birinchi marta sodir bo‘ldi.
Dekabr oyida Niderlandiyaning F-35 samolyotlari Boltiq dengizi ustida rus samolyotlarini tovushdan tez raketalar bilan ushlab oldi. 2024-yilning bahorida F-35A qiruvchi samolyoti yadroviy bombalardan foydalanish uchun sertifikatlangan.
Izoh (0)