Amerikaning Southwest Airlines aviakompaniyasining yo‘lovchi samolyoti 25-fevral kuni Chikagodagi Miduey xalqaro aeroportiga qo‘nish chog‘ida xususiy samolyot bilan to‘qnashishiga bir baxya qoldi. Bu haqda Fox News telekanali xabar berdi.
Southwest aviakompaniyasining Nebraska shtati Omaha shahridan kelgan 2504-reysi uchish-qo‘nish yo‘lagiga chiqqan boshqa samolyot bilan “ehtimoliy to‘qnashuv”dan qochish uchun ogohlantiruvchi manyovrni amalga oshirdi, deyiladi aviakompaniya bayonotida.
Yo‘lovchi samolyoti so‘nggi daqiqada havoga ko‘tarilishga majbur bo‘lgan. Chunki uchish-qo‘nish yo‘lagiga chiqib qolgan biznes-jet uning yo‘lini to‘sib qo‘ygan. Shundan so‘ng yo‘lovchi samolyoti eson-omon qo‘nishga muvaffaq bo‘lgan. Hozirda AQSH Fuqarolik aviatsiyasi federal boshqarmasi hodisa yuzasidan tergov olib bormoqda.
AQSHda yuz bergan so‘nggi aviahalokatlar:
25-yanvar Alyaska yarim orolida AQSHning F-35A qiruvchi samolyoti qulab tushdi. Uchuvchi katapulta qilishga ulgurdi va tirik qoldi.
30-yanvar kuni ertalab American Airlines yo‘lovchi samolyoti Vashington aeroporti yaqinida harbiy vertolyot bilan to‘qnashdin, so‘ngra Potomak daryosiga quladi. Oqibatda hech kim omon qolmadi, 5-fevral kuni aviahalokatda halok bo‘lgan barcha 67 kishining jasadi Vashingtondagi daryodan olib chiqildi.
1-fevral kuni AQSHning Filadelfiya shahrida aviahalokat yuz berdi: tez tibbiy yordam samolyoti turar joy hududiga qulab tushdi, uylar va avtomobillarga zarar yetdi.
7-fevral kuni bortida 10 kishi bo‘lgan samolyot Alyaskada g‘oyib bo‘ldi.
11-fevralda esa Arizonadagi aeroportda ikkita samolyot to‘qnashib ketdi. Favqulodda vaziyat oqibatida bir kishi halok bo‘ldi, yana uch kishi jarohat oldi.
12-fevralda AQSH harbiy-dengiz kuchlarining samolyoti San-Diego ko‘rfaziga qulab tushdi. Aviahalokat Nort-Aylend harbiy aviabazasi yaqinida yuz bergan. Samolyot bortida ikki kishi bo‘lgan. Ularni baliq ovlash kemasi qutqarib qolgan.
19-fevral AQSHning Arizona shtati osmonida 19-fevral kuni kichik samolyotlar to‘qnashdi, oqibatda ikki kishi halok bo‘ldi. Har bir samolyot bortida ikkitadan odam bo‘lgan. To‘qnashuv Tuson shahri yaqinida sodir bo‘lgan. To‘qnashuvdan so‘ng Cessna 172 samolyoti xavfsiz qo‘nishga muvaffaq bo‘lgan. Biroq Lancair 360 MK II uchish-qo‘nish yo‘lagi yaqinida yerga qulab, yonib ketgan.
Izoh (0)