Filadelfiyada tez tibbiy yordam samolyoti halokatga uchradi. Samolyot bortida bo‘lgan olti kishining barchasi halok bo‘lgan, deb xabar bermoqda BBC.
Samolyot Filadelfiya shimoli-sharqida havoga ko'tarilganidan ko'p o'tmay qulab tushgan. Halokatga uchragan Learjet 55 samolyotiga egalik qilgan tez tibbiy yordam kompaniyasi bortda to‘rt nafar ekipaj a’zosi, bir bemor va bir shifokor bo‘lganini ma’lum qildi.
"Biz hozirda tirik qolganlar borligini tasdiqlay olmaymiz", deyiladi Jet Rescue Air Ambulance bayonotida.
Mahalliy OAV maʼlumotlariga ko‘ra, falokat mahalliy vaqt bilan soat 18:30 atrofida Ruzvelt savdo markazi yaqinida sodir bo‘lgan.
Filadelfiya meri Sherel Parker voqea joyidan o‘tkazgan matbuot anjumanida samolyot qulagan joyda bir necha uy va mashina yonayotganini aytdi.
Tez tibbiy yordam samolyoti Missuri shtatidagi Springfild-Branson shahriga yo‘l olayotgan bo‘lgan. Halokat sabablari hozircha noma’lum.
Bu AQSHda bir hafta ichidagi ikkinchi samolyot halokatidir. 30-yanvar kuni Vashington osmonida samolyot va harbiy vertolyot to'qnashib ketgandi. O‘sha voqea oqibatida jami 67 kishi halok bo'ldi.
Izoh (0)