АҚШ Тайван атрофидаги вазиятни “ўзгартириши мумкин бўлган” бешта сувости дронини синовдан ўтказади. Бу ҳақда АҚШ Ҳарбий-денгиз кучлари штаби бошлиғи адмирал Майкл Гилдей АҚШ Конгресси Вакиллар палатасининг Қуролли кучлар қўмитасидаги тингловда маълум қилди.
Адмиралнинг сўзларига кўра, ҳозирда Калифорния қирғоқларида илк сувости аппарати синовдан ўтказилмоқда, ундан кейин яна бештаси синовдан ўтказилади.
“Бундай қурилма ёрдамида миналарни ўрнатиш мумкин. Бу эса Тайван атрофидаги вазиятни тубдан ўзгартиради”, — деди Гилдей.
Шу тариқа у конгрессменлардан бирининг “АҚШ арсеналида Хитойнинг Тайванга бостириб киришининг олдини олиш учун ҳозир фойдаланиш ёки модернизация қилиш мумкин бўлган воситалар борми” деган саволига жавоб берди.
28 апрель куни Хитой армияси Тайван томон 38 та қирувчи самолёт ва жанговар дрон учиргани ҳақида хабар берилди.
Аввалроқ Тайван Хитойнинг эҳтимолий босқинига қарши туриш учун АҚШдан 400 тагача Ҳарпоон кемага қарши ракеталарни сотиб олаётгани маълум бўлганди. Пентагон ушбу ракеталарни етказиб бериш учун Boeing компанияси билан 1,7 миллиард долларлик шартнома имзолаган. Шартнома АҚШ ва Хитой ўртасидаги юқори кескинлик даврида амалга оширилди. Тайван кескинликнинг асосий манбаи ҳисобланади.
Тайван 1949 йилда Хитойдан мустақиллигини эълон қилган. Пекин ҳамон оролни ўзининг сепаратист вилояти деб билади. Бироқ Тайпей ХХР таклиф қилган “Бир давлат, икки тизим” моделини рад этиб келади.
Хитой миллий мудофаа стратегиясини акс эттирувчи Оқ китобида қайта бирлашишга қаратилган тинчлик саъй-ҳаракатларида ўсиш бўлмаса, Тайван муаммосини куч билан ҳал қилишни истисно этмаган. Хусусан, ташқи кучлар ва орол давлатнинг мустақиллигини қўллаб-қувватловчиларнинг эҳтимолий аралашуви билан бундай қарор қабул қилиниши мумкин.
Изоҳ (0)