Kaliforniya shtatining San-Diego shahrida Cessna samolyotining turar joy mavzesiga qulashi oqibatida bir necha kishi vafot etdi. Bu haqda ABC News telekanalining mahalliy bo‘linmasi xabar bermoqda.
Ularning ma’lumotlariga ko‘ra, barcha qurbonlar samolyot ichida bo‘lgan. Yerda bo‘lgan odamlar orasida jabrlanganlar yo‘q. Aniq qancha kishi halok bo‘lgani haqidagi ma’lumot hozircha keltirilmagan.
BBC News’ning xabar qilishicha, samolyotda uchuvchi bilan birga 8-10 kishi bo‘lgan bo‘lishi mumkin. Dastlabki ma’lumotlarga ko‘ra, zarar ko‘rgan 15 ta uyda yashovchilarning hech biri jiddiy jarohat olmagan. Taxminan 100 kishi xavfsiz joyga ko‘chirilgan. Ushbu hududdagi bittadan tashqari barcha yong‘inlar bartaraf etilgan.
Agentlik ma’lumotlariga ko‘ra, samolyot yaqin atrofda joylashgan Montgomeri-Fild aeroportiga yo‘l olgan.
“Hodisa joyida aviatsiya yoqilg‘isi to‘kilgan. Bizning asosiy vazifamiz — barcha uylarni tekshirish va odamlarni xavfsiz joyga olib chiqish”, deydi mahalliy o‘t o‘chiruvchilar vakili Den Eddin. U samolyot “bir nechta uyga zarar yetkazganini” ta’kidlagan.
Qayd etilishicha, voqea sodir bo‘lgan paytda San-Diegoda juda qalin tuman bo‘lgan.
AQSHda samolyotlar ishtirokidagi so‘nggi aviahodisalar:
5-yanvar Alyaska yarim orolida AQSHning F-35A qiruvchi samolyoti qulab tushdi. Uchuvchi katapulta qilishga ulgurdi va tirik qoldi.
30-yanvar kuni ertalab American Airlines yo‘lovchi samolyoti Vashington aeroporti yaqinida harbiy vertolyot bilan to‘qnashdi, so‘ngra Potomak daryosiga quladi. Oqibatda hech kim omon qolmadi, 5-fevral kuni aviahalokatda halok bo‘lgan barcha 67 kishining jasadi Vashingtondagi daryodan olib chiqildi.
1-fevral kuni AQSHning Filadelfiya shahrida aviahalokat yuz berdi: tez tibbiy yordam samolyoti turar joy hududiga qulab tushdi, uylar va avtomobillarga zarar yetdi.
7-fevral kuni bortida 10 kishi bo‘lgan samolyot Alyaskada g‘oyib bo‘ldi
11-fevralda esa Arizonadagi aeroportda ikkita samolyot to‘qnashib ketdi. Favqulodda vaziyat oqibatida bir kishi halok bo‘ldi, yana uch kishi jarohat oldi.
12-fevralda AQSH harbiy-dengiz kuchlarining samolyoti San Diego ko‘rfaziga qulab tushdi. Aviahalokat Nort Aylend harbiy aviabazasi yaqinida yuz bergan. Samolyot bortida ikki kishi bo‘lgan. Ularni baliq ovlash kemasi qutqarib qolgan.
19-fevral AQSHning Arizona shtati osmonida 19-fevral kuni kichik samolyotlar to‘qnashdi, oqibatda ikki kishi halok bo‘ldi. Har bir samolyot bortida ikkitadan odam bo‘lgan. To‘qnashuv Tuson shahri yaqinida sodir bo‘lgan. To‘qnashuvdan so‘ng Cessna 172 samolyoti xavfsiz qo‘nishga muvaffaq bo‘lgan. Biroq Lancair 360 MK II uchish-qo‘nish yo‘lagi yaqinida yerga qulab, yonib ketgan.
25-fevral Amerikaning Southwest Airlines aviakompaniyasining yo‘lovchi samolyoti Chikagodagi Miduey xalqaro aeroportiga qo‘nish chog‘ida xususiy samolyot bilan to‘qnashishiga bir baxya qoldi. Yo‘lovchi samolyoti so‘nggi daqiqada havoga ko‘tarilishga majbur bo‘lgan.
Nyu York shtatida 10-aprel kuni aviahalokat yuz berdi. Vertolyot Gudzon daryosiga qulab tushishi oqibatida 6 kishi halok bo‘ldi.
Izoh (0)