Германия ҳукумати Россиянинг Украинадаги босқини туфайли уйларини ташлаб кетишга мажбур бўлган ва мамлакатнинг бошқа ҳудудларига кўчиб ўтган қочқинларга ёрдам бериш учун 200 миллион евро (199 миллион доллар) ажратади. Бу ҳақда Германиянинг иқтисодий ҳамкорлик ва ривожланиш вазири Свеня Шульцэ маълум қилди.
«Пуллар Украинада ички кўчирилганларни асосий эҳтиёжлари билан таъминлашда давом этиш учун мўлжалланган», — деди у.
Шульцэнинг қўшимча қилишича, у Украина бош вазири Денис Шмигал билан қочқинларга Германия томонидан янада кўпроқ ёрдам бериш масаласини муҳокама қилмоқда.
Бирлашган Миллатлар Ташкилоти маълумотларига кўра, 2 сентябрь ҳолатига Украинадаги ички кўчирилганлар сони қарийб 7 миллион кишига етган. Тахминан, яна шунча фуқаро қочқин сифатида Европага жўнаб кетган, улардан 4 миллионга яқини тегишли мақом ёки ҳукумат дастурлари доирасида бошқа турдаги ҳимоя сўраган. 30 август ҳолатига кўра, Германияда 970 мингдан кўпроқ украиналик қочқин бор. Германия Европа Иттифоқига аъзо давлатлар орасида украиналикларни энг кўп қабул қилган мамлакат ҳисобланади.
Изоҳ (0)