Эстония собиқ президенти россияликларнинг Европага киришини тақиқлашни таклиф қилди

Эстониянинг собиқ президенти Тоомас Хендрик Ильвес Россия фуқароларининг Европа Иттифоқ давлатларига киришини вақтинча тақиқлаш таклифини берди, деб ёзмоқда Meduza.

«Эҳтимол, Россиядан ҳар қандай, таъкидлаб айтаман, ҳар қандай киришлар учун танаффус керак. Қрим эгаллангунига қадар, улар мағрурлик билан Европа Иттифоқида визасиз режимни талаб қилди. Оилавий фавқулодда ҳолатлардан ташқари, барча визаларни музлатиб қўйинг. Европа дахлсизлиги хавф остида», — деб ёзган Ильвес ўзининг Twitter саҳифасида.

«Фуқаролик самолётларини уриб тушириш, Европада одамларни заҳарлаш ва ўлдириш, давлатларга бостириб кириш ва эгаллаб олиш. Бу менга қочқин давлатни эслатяпти», — деб қўшимча қилди у.

Maybe there should be a "time out" for any and I mean *any* visits from Russia.

Up to the invasion of Crimea these people were arrogantly demanding visa-free travel with the EU.

Just freeze visas except for family emergencies.

It is Europe's security at stake.

Enough.

— toomas ilves, ex-verif (@IlvesToomas) April 17, 2021

Россия элчихонасининг Разведка бош бошқармасига (ГРУ) ишлашда гумон қилинган 18 нафар ходими Чехиядан чиқариб юборилгач, Эстонияни 2006 йилдан 2016 йилгача бошқарган Ильвес ушбу мурожаат билан чиқди.

Шунингдек, Прага расмийларининг таъкидлашича, Россиянинг махсус хизматлари 2014 йил Врбетице қишлоғидаги қурол-яроғ омборида бўлиб ўтган портлашларга ҳам алоқадор. Россия Ташқи ишлар вазирлиги бу айбловларни «асоссиз» ва «бемаъни» деб атади ҳамда жавоб чоралари кўрилишини ваъда қилди.

Россия ахборот агентликларининг хабар беришича, Чехиянинг Россиядаги элчиси Витезслав Пивонка Россия ташқи ишлар вазирлигига чақирилган.

Аввалроқ Польша, Британия ва НАТО АҚШнинг Россияга қарши санкцияларини қўллаб-қувватлади. Шундай бўлишига қарамай, Байден ва Путиннинг учрашуви ўз кучида қолиши маълум қилинди.

Шунингдек, Жо Байден Россия ҳукуматининг «зарарли ташқи ҳаракатлари» туфайли унга қарши санкциялар жорий қилгандан сўнг, 15 апрель куни Россия ҳақида баёнот чиқарди.

«Агар Россия бизнинг демократиямизга аралашишда давом этса, мен бунга жавобан кейинги чораларни кўришга тайёрман. Бу менинг АҚШ президенти сифатидаги вазифам», — деди Байден Оқ уйдаги баёнотида.