Ўзбекистонга Украинадан дам олиш ва реабилитация учун 45 бола ҳамда беш нафар ҳамроҳлик қилувчи гуруҳ Ўзбекистонга етиб келди. Бу ҳақда мамлакатнинг Тошкентдаги элчиси Николай Дорошенко ўзининг Facebook’даги саҳифаси орқали маълум қилди.
Харьков, Херсон, Николаев, Запорожье, Суми, Хмелниский, Лвов ва Киевдан келган болалар 12 кун давомида “Анор” тоғ оромгоҳида дам олади.
“Миллий анъаналар асосидаги қабул таъсирли ва самимий тарзда ўтди”, — деб ёзади украиналик дипломат.
Шу билан бирга, у Украина шаҳарларига амалга оширилаётган ҳаво тревогалари ва ракета ҳужумларини унутишга ёрдам бериш ҳақидаги мурожаатини жавобсиз қолдирмаган Ўзбекистон бизнес ва жамоат ташкилотлари вакилларига раҳмат айтган.
“Ишончим комилки болалар Ўзбекистонда бўлган вақтида ўзбек халқининг маданияти ва анъаналари билан танишади”, — дейди у.
Маълумотларга кўра, ҳозирда Европа Иттифоқи давлатларида вақтинчалик ҳимоя мақомини олган Украинадан келган 4 миллиондан ортиқ қочқин бор. Июнь ойида уларнинг сони қарийб 46 минг кишига кўпайди, бу май ойига нисбатан 1,1 фоизга кўпдир.
Изоҳ (0)