Германия Мудофаа вазирлиги Россия қўшинларининг Украинадаги янги ҳужуми 2023 йил апрелида бошланиши ва муқаррар бўлиши мумкинлигини прогноз қилди. Бу ҳақда Neue Zürcher Zeitung нашри хабар берди.
Прогнозга кўра, Кремль Беларуснинг урушга қўшилишига умид қилмоқда, аммо ҳужумнинг иккита сценарийси бор. Биринчи сценарийда Владимир Путин бутун Донбассни, иккинчисида Украинани тўлиқ босиб олишни мақсад қилган. Иккаласида умумий жиҳат шуки, муҳим инфратузилмага ҳужумлар урушнинг ажралмас қисми бўлиб қолади. Россиянинг мақсади украиналикларнинг қаршилик кўрсатишини заифлаштириш ва Европа Иттифоқига қочқин сифатида кетишини қўзғатиш.
Биринчи сценарий
Биринчи сценарийда Германия Мудофаа вазирлиги Россия апрель ойида Донбассни тўлиқ эгаллаш учун ҳужумга ўтишини тахмин қилмоқда. Бу орқали Александр Лукашенко ўн минглаб беларус аскарларини Украина кучларини тарқатиб юбориш учун чегарага жойлаштиради. Бироқ, вазирликнинг ёзишича, Беларусь босқинини кутмаслик керак, чунки Лукашенко Украинада уруш бошлашнинг «потенциал ички беқарорлаштирувчи» оқибатларидан қўрқади.
Агар рус қўшинлари Донбассни тўлиқ қўлга киритишга муваффақ бўлса, режанинг иккинчи қисми амалга ошади. Россия қуролли кучлари босиб олинган ҳудудларни хандакларга айлантира бошлайди. Шу билан бирга, Путин халқаро ҳамжамиятга тинчликдан манфаатдор эканини кўрсатиш учун Украинага яна музокаралар ўтказишни таклиф қилади.
Кремль раҳбарининг бундай баёноти халқаро ҳамжамиятнинг Украинани қўллаб-қувватлашга қарши чиқишга қаратилган бўлади.
Иккинчи сценарий
Иккинчи сценарий икки жабҳада уруш олиб боришни ўз ичига олади. Россия қўшинлари Донбассда ҳужумга ўтади ва 70 минггача беларус аскари шимолдан Киевга юборилади. Айни пайтда, Россия қўшинлари Украинага қурол етказиб беришни тўхтатиш учун Польша чегарасига боради.
Мақола муаллифларининг фикрича, ушбу сценарийнинг зарурий шарти Россиядаги умумий сафарбарликдир. Бу «ички сиёсий сабабларга кўра» амалга ошиши даргумон. Бироқ Россияда иккинчи сафарбарлик тўлқини 2023 йил бошида яқинлашиши белгилари кучаймоқда.
Мавзуга доир:
Изоҳ (0)