Украина собиқ президенти Виктор Януковичнинг собиқ маслаҳатчиси Андрей Портнов Испания пойтахти Мадриддаги мактаб ёнида отиб ўлдирилди. Бу ҳақда Cadena SER радиоси хабар берди.
Дастлабки маълумотларга кўра, эрталаб 52 ёшли Андрей Портнов фарзандларини Мадриднинг Посуэло-де-Аларкон туманидаги мактабга олиб борган. Соат 09:15 да машинасига ўтирмоқчи бўлган пайтда номаълум шахс унга бир неча бор ўқ узган. Олган жароҳатлари туфайли воқеа жойида ҳалок бўлган.
Унинг танасида кўкрак соҳасида тўртта ва бошида битта ўқ изи аниқланган.
Ҳуқуқ-тартибот идораларидаги манбаларнинг айтишича, Портновни мактаб кираверишида бир неча киши пойлаб турган бўлган. El Pais газетаси маълумотларига кўра, улар икки ёки уч киши бўлган. Қотилликдан сўнг жиноятчилар ўрмонзор томонга қочган. Манбалар жиноят сабаби ўч олиш бўлиши мумкинлигини таъкидлашмоқда. Ҳозирда воқеа жойида терговчилар ишламоқда.
Портнов ким эди?
Андрей Портнов 1973 йилда Луганскда туғилган. 1997 йилда у Украина давлат тизимида фаолиятини бошлаган. Тўққиз йилдан сўнг Олий Рада депутати бўлган. Бундан ташқари, у собиқ бош вазир Юлия Тимошенко жамоасининг бош юристи лавозимида ишлаган.
2010 йилда Портнов президент Янукович маъмурияти раҳбари ўринбосари этиб тайинланган. Шунингдек, у Суд-ҳуқуқ ислоҳотлари ва суд тизими масалалари бўйича бош бошқарма раҳбари бўлган. Портнов 2014 йил февралигача давлат раҳбари маъмуриятида ишлаган, ҳокимият алмашганидан сўнг Украинани тарк этиб, хусусий адвокатлик фаолияти билан шуғуллана бошлаган. Шу давр мобайнида у турли мамлакатларда истиқомат қилган.
Портновга нисбатан Европа Иттифоқи ва Канада санкциялар жорий этган, аммо 2015 йилда у судда ғалаба қозониб, чекловлар бекор қилинган. Украинада эса уни лавозимини суиистеъмол қилиб мулк ўзлаштиришда айблашиб, қидирувга берган. Бироқ маълум вақт ўтгач, гўёки уни топа олишмади, деган баҳона билан қидирув бекор қилинган.
Украина оммавий ахборот воситаларининг хабар беришича, Портнов Украинанинг амалдаги президенти Владимир Зеленский жамоаси билан ҳамкорлик қилган. Уларга Олий Радани тарқатиб юбориш бўйича маслаҳат берган. Маъмурият бу каби миш-мишларни инкор этган. Шундай бўлса-да, 2019 йилда Портнов Украинага қайтиб келиб, у ерда ҳуқуқшунос сифатида фаолият юритган. У мамлакатнинг собиқ президенти Пётр Порошенкони давлатга хиёнат қилиш, ҳокимиятни эгаллаб олишга уриниш ва хизмат ваколатларини суиистеъмол қилишда айблаган, шундан сўнг собиқ президентга нисбатан тергов бошланган. Портнов шунингдек, Украинанинг экстремистик “Миротворес” сайти маълумотлар базасида ҳам рўйхатга олинган.
Изоҳ (0)