Польша президенти Анжей Дуда Киевга келди, у Украина президенти Владимир Зеленский билан учрашади, дея хабар бермоқда Польша раҳбари канцелярияси. Икки етакчининг учрашуви Украина мустақиллиги куни арафасида бўлиб ўтмоқда.
Дуданинг Киевга ташрифи ҳақида бу сафар ҳам олдиндан эълон қилинмаган.
«Ташриф чоғида президентлар ва делегациялар ўртасида Украинадаги вазият, ҳарбий, иқтисодий ва гуманитар соҳаларда қўллаб-қувватлаш, ўзаро ҳамкорлик бўйича икки томонлама музокаралар ўтказилади», — дейилади хабарда.
Бундан ташқари, Дуда «Қрим платформаси» иккинчи саммитида иштирок этади.
Дуданинг Украинага ташрифи Украинада 24 августда нишонланадиган Мустақиллик куни арафасида амалга оширилмоқда. Ўша куни ракета ҳужумлари уюштирилиши хавфи сабаб АҚШнинг Киевдаги элчихонаси ўз фуқароларини Украинани тарк этишга чақирган.
Дуда ва Зеленскийнинг мазкур учрашуви йил бошидан бери бешинчи ва Россиянинг Украинадаги босқини бошланганидан бери учинчи учрашувдир.
Май ойидаги ташрифи чоғида Дуда Украина Олий Радасида шахсан сўзга чиққан. Ўз нутқи давомида у Украина Европа Иттифоқига аъзо бўлмагунча «тинчимаслиги»ни айтган. Дуда шунингдек, яхши қўшничилик тўғрисидаги янги Украина—Польша шартномасини имзолашни таклиф қилган ва Польшага кўчган Украина фуқаролари мамлакат учун қочқин ҳисобланмаслигини ишонтириб айтган.
Изоҳ (0)