Ғарб давлатлари Киевга ўз ҳудудида ҳарбий хизматга мажбур бўлган украиналикларни топиш ва уларни Украинага юборишда ёрдам беришдан бош тортди, деб хабар берди Bloomberg.
Хабарга кўра, Украина президенти Владимир Зеленский икки томонлама учрашувлар доирасида иттифоқчилардан бу ҳақда сўраган. Бироқ, нашрнинг таъкидлашича, Ғарб давлатларининг сиёсатчилари уруш давом этар экан, украиналик қочқинларни ўз ватанларига жўнатмасликларини айтишган.
Украина расмийларига кўра, 2022 йил 24 февралдан буён сафарбарлик ёшидаги 650 минг нафарга яқин эркак хорижга кетган. Ҳарбий кадрлар танқислигини ҳисобга олиб, Киев уларни қайтаришга ҳаракат қилмоқда. 2024 йил 23 апрелдан Украинанинг хориждаги дипломатик ваколатхоналари 18 ёшдан 60 ёшгача бўлган эркакларга консуллик хизматларини кўрсатишни тўхтатган эди.
Украина ТИВ раҳбари Дмитрий Кулеба мазкур қарорни мамлакатда уруш кетаётгани ва хорижда қолиш сафарбарликка тортилувчи фуқароларни ватан олдидаги масъулиятдан озод қилмаслиги билан изоҳлаган.
БМТнинг Қочқинлар бўйича олий комиссарлиги бошқармаси маълумотларига кўра, ҳозирда 2022 йил февралида Россия-Украина уруши бошланганидан сўнг мамлакатни тарк этган 6 миллионга яқин украиналик хорижда қочқин бўлиб қолмоқда. Украина марказий банкининг прогнозларига кўра, 2024 йилда яна 400 минг киши мамлакатни тарк этади.
Изоҳ (0)