Украиналик қочқинлар Исроил касалхоналарида бепул тиббий ёрдам олиш имкониятидан маҳрум бўлди, бундан ташқари, 60 ёшдан ошган Украина фуқаролари учун суғурта бекор қилинди. Бу ҳақда Исроил ижтимоий ҳимоя вазирлигига таяниб, NEWSru хабар бермоқда.
Исроил Молия вазирлиги кутилмаганда исроиллик бўлмаган фуқароларнинг даволаниши учун пул тўлашни тўхтатишга қарор қилди. Ҳозирда мамлакатда қочқин мақомида бўлган 14 692 нафар Украина фуқароси бор. Молиялаштиришни тўхтатиш сабаби ошкор этилмаган.
Украинада кенг кўламли уруш бошланганидан бери Исроил Молия вазирлиги украиналик қочқинларга ёрдам бериш учун 100 миллион шекел (тахминан 30 миллион доллар) ажратди. Ушбу маблағнинг 80 фоизи дори-дармонларга сарфланган.
Аввалроқ Польшадаги қочқинлар марказида украиналиклар оммавий заҳарлангани ҳақида хабар берилганди.
Аввал Бирлашган Миллатлар Ташкилоти уруш бошланганидан буён Европага келган украиналик қочқинлар сони 8 миллионга яқинлашганини маълум қилган.
Изоҳ (0)