Тўққиз соат ва ундан ортиқ давом этадиган тунги уйқу когнитив функцияларнинг ёмонлашишига олиб келиши мумкин. Бу таъсир депрессия аломатлари бўлган одамларда яққол намоён бўлади. Сан-Антониодаги Техас университети Тиббиёт фанлари маркази олимлари шу хулосага келиб, натижаларини Alzheimerʼs & Dementia журналида эълон қилишди.
Тадқиқот ХХ аср ўрталаридан бери АҚШ Миллий юрак, ўпка ва қон институти ҳомийлигида ўтказиб келинаётган йирик когорта тадқиқоти - Framingham Heart Study иштирокчиларининг 1853 нафарининг маълумотлари асосида ўтказилган. Танланмага 27 ёшдан 85 ёшгача бўлган, инсульт ёки деменцияга чалинмаган одамлар киритилган.
Таҳлиллар шуни кўрсатдики, узоқ муддатли уйқу умумий когнитив функция, хотира, визуал-фазовий идрок ва ижро кўникмаларининг паст кўрсаткичлари билан боғлиқ экан. Бу бузилишлар антидепрессантлар қабул қилиш-қилмаслигидан қатъи назар, депрессия белгилари бўлган одамларда айниқса яққол кузатилган.
Муаллифларнинг таъкидлашича, депрессия кўпинча уйқу бузилиши билан бирга кечади ва депрессиядан азият чекаётганларнинг тахминан 90 фоизи ухлаш ёки уйғониш билан боғлиқ муаммолар ҳақида хабар беради. Янги тадқиқотда иштирокчилар депрессия аломатларининг мавжудлиги ва антидепрессантлардан фойдаланишига қараб тўрт гуруҳга бўлинган. Когнитив кўрсаткичларнинг энг сезиларли даражада ёмонлашуви даволанишдан қатъи назар, узоқ вақт ухлайдиган ва депрессия белгиларига эга бўлганларда қайд этилган.
Олимларнинг таъкидлашича, аксарият ташкилотларнинг когнитив саломатлик бўйича тавсиялари ўзгаришсиз қолмоқда — катталар кунига 7-8 соат ухлашга интилишлари керак. Бироқ уйқунинг оптимал давомийлигини ҳар бир кишининг соғлиғидаги ўзига хос хусусиятлардан келиб чиққан ҳолда белгилаш лозим.
Изоҳ (0)