Тошкентдаги Мустақиллик майдони кўчасида жойлашган Вазирлар Маҳкамаси биноси маданий мерос объектлар рўйхатига киритилиши кутилмоқда. Бу ҳақда Маданий мерос агентлиги томонидан ишлаб чиқилган қарор лойиҳасида режалаштирилган.
Ҳужжат ҳукуматнинг 2019 йил 4-октябрдаги қарори билан тасдиқланган Моддий маданий мероснинг кўчмас мулк объектлари миллий рўйхатига ўзгартириш ва қўшимчалар киритишни назарда тутади. Унга кўра, Мустақиллик майдони кўчасида жойлашган Вазирлар Маҳкамаси биносини ҳам рўйхатга киритиш кўзда тутилмоқда.
Рўйхатга яна 130 га яқин объектларни киритиш режалаштирилган. Улар орасида масжидлар, музейлар ва турар жой бинолари ҳам бор. Тошкент шаҳри Шота Руставели, Бешёғоч кўчаларидаги қатор уйлар, Санъацҳунослик илмий-тадқиқот институти биноси, Павел Бенков номидаги Республика ихтисослаштирилган рассомлик мактаби бинолар мажмусини Архитектура ёдгорликлари позициясида рўйхатга киритилиши кутилмоқда.
Ҳужжатда қайд этилишича, Ўзбекистон халқининг умуммиллий бойлиги ҳисобланадиган моддий маданий меросини муҳофаза қилиш, асраш ва улардан фойдаланилиши устидан давлат назоратини амалга ошириш, ёдгорликларини тартибга солиш, рўйхатини шакллантириш, тарихийлигини сақлаш ҳамда уларни аҳамиятини ошириш учун шарт-шароитлар яратиш мақсад қилинган.
Ушбу қарор лойиҳаси жамоатчилик муҳокамаси 23 майгача давом этади.
Вазирлар Маҳкамаси биноси
Тошкент шаҳрининг Мустақиллик майдонида жойлашган 7 қаватли бино. 1999 йил февралда содир бўлган қўпорувчилик вақтида шикастланган бино 2000 йилда таъмирланган. Таъмирлашда бинони мустаҳкамлаш, “Ҳукумат уйи” талабига мос янги меъморий ечимини ҳал этишга аҳамият берилган. 1-қавати қизил мармар девор билан беркитилган.
Асосий кириш эшиги устидаги том чизиғидан чиқиб юқорига кўтарилган ойна деворда республика герби ва байроғи ўрнатилган. Тилларанг ойналари гранитлар ишлатилган пойдевор сиртидаги қопламалар билан уйғунлашган. Бинонинг ички қисми ҳам қайта таъмирланган.
Бу ерда бош вазир, вазирлар ва бошқа ҳукумат аъзолари ишлайди. Давлат сиёсатини ишлаб чиқиш, муҳим фармойиш ва қарорларни қабул қилиш жараёнлари айнан шу бинода амалга оширилади.
Изоҳ (0)