Сурхондарёдаги бозорда аёл ёш қизчани пичоқлагани акс этган видео тарқалганди. Бош прокуратура матбуот котиби Ҳаёт Шамсутдиновнинг “Дарё” сўровига кўра маълум қилишича, қизча вафот этган.
Воқеа 1 май куни Денов туманида содир бўлган. Қизалоқ олган тан жароҳатлари оқибатида туман тиббиёт бирлашмасида вафот этган. Гумонланувчи аёл процессуал тартибда ушланган. Олинган дастлабки маълумотларга кўра, аёл руҳий касалликлар диспансерида рўйхатда турган.
Тармоқда тарқалган видеода аёл онаси билан кетаётган қизчага одамлар кўз ўнгида пичоқ ургани, сўнг пичоқни ташлаб кетиб қолганини кўриш мумкин. Қизча кўп қон йўқотган. Уни пичоқлаган аёл ҳуқуқ-тартибот органлари томонидан ушланган.
Ҳозирда аёлга нисбатан Жиноят кодексининг 97-моддаси (қасддан одам ўлдириш) билан жиноят иши қўзғатилди. Тергов ҳаракатлари давом этмоқда.
Апрель ойининг ўрталарида Фарғона вилоятида эркак туши сабаб ухлаб ётган хотинини ўлдиргани хабар қилинганди. Улар орасида келишмовчилик ёки жанжал бўлмаган. Тушида аёлининг хиёнатини кўрган эркак уни пичоқлаб ўлдирган.
2024 йилнинг ёзида Тошкентда эркак 3 ёшли болани ваҳшийларча ўлдирганди. Қотиллик содир этган эркак 24 йилга озодликдан маҳрум қилинди.
Изоҳ (0)