Франциянинг Мюлуз шаҳрида 22 февраль куни жазоирлик мигрант ўткичиларга пичоқ билан ҳужум қилди. Оқибатда бир киши ҳалок бўлди, 5 нафар полициячи жароҳатланди. Бу ҳақда France 24 хабар берди.
Гумонланувчи воқеа жойида қўлга олинган. Дастлаб жароҳатланганлар сони икки нафарни ташкил этган. Жумладан, рркак икки нафар полициячига бирининг бўйнидан, иккинчисининг кўкрак қисмидан жиддий жароҳат етказган. Ҳодисага бевосита гувоҳ бўлган шахс аралашмоқчи бўлганида ҳужумга учраган ва ҳалок бўлган.
Ҳодиса полициячилар патруллик қилаётган Конгони қўллаб-қувватлаш намойишида юз берган. Маҳаллий прокурорга кўра, гумонланувчи 37 ёшли жазоирлик бўлиб, у терроризмда гумонлангани сабабли мамлакатни тарк этиши керак эди. Унга Франция ҳудудини тарк этиш мажбурияти юкланган, бироқ Жазоир унга консуллик визасини бермаган. Ҳолат юзасидан тергов ҳаракатлари олиб борилмоқда.
Дунё бўйлаб январь февраль ойларида бир қатор пичоқбозликлар ва одамларни қасддан босиб кетиш ҳолатлари кузатилди:
20 февраль куни Чехияда савдо марказидаги пичоқбозликда икки аёл ҳалок бўлди. Гумонланувчи 16 ёшли ўсмир. У воқеадан ўн дақиқа ўтиб қўлга олинган. Полиция маълумотларига кўра, иккала қурбон ҳам ҳужум содир бўлган дўконда ишлаган. Ҳужум сабаби ҳозирча номаълум, тергов давом этмоқда.
16 февраль куни Австрияда суриялик эркак ўткинчиларни пичоқлади. Ҳужум оқибатида 14 ёшли ўсмир ҳалок бўлди ва яна 5 киши жароҳат олди, улардан икки нафари оғир аҳволда. Жиноятчини қўлга олишда яқин атрофда бўлган суриялик курер муҳим рол ўйнади. У янги қурбонларнинг олдини олиш учун ҳужум қилган эркакни атайлаб машинасида уриб юборди.
13 февраль куни Германияда афғонистонлик муҳожир оломонни машинада босиб кетди. Оқибатда 28 киши жароҳат олди, улар орасида болалар ҳам бор. Жабрланганларнинг камида биттаси оғир аҳволда.
31 январь Россияда эркак поезд йўловчиларига пичоқ билан ҳужум қилди. Оқибатда эркак ва аёл жароҳатланди. Йўловчилар вагондан эвакуация қилинган, эркак эса қўлга олинган.
22 январь Германияда афғонистонлик эркак одамларга пичоқ билан ҳужум қилди. Қурбонлар 41 ёшли эркак ва 2 ёшли ўғил бола бўлган. Бундан ташқари, полиция хабарида икки нафар оғир ярадор шифохонага жойлаштирилгани айтилган.
22 январь Тель-Авивда пичоқ билан қуролланган эркак одамларга ҳужум қилди. Ҳодиса оқибатида 4 киши жароҳат олган. Ҳужум қилган шахс 2022 йилдан бери АҚШ резиденти ҳисобланган марокашлик Қоди Абдел Азиз экани айтилмоқда. У зарарсизлантирилган.
14 январь Красноярск халқаро аэропортида ўзбекистонлик эркак пичоқ билан одамга ҳужум қилди. Ўзбекистон фуқароси маст ҳолда бўлганини айтган, жабрланувчи шифохонага ётқизилган.
Изоҳ (0)