Тошкент шаҳар Олмазор туманида ҳамкасбини пичоқлаган шахс иши судда кўриб чиқилди. Бу ҳақда “Миллар” информацион дастурида маълум қилинди.
Қайд этилишича, 23 ёшли фуқаро гўшт маҳсулотларини ишлаб чиқариш цехида бирга ишлаб келаётган таниши билан жанжаллашиб қолган. Жанжал оқибатида йигит жабрланувчининг чап кўкрак ва сон қисмига пичоқ урган.
Шифокорларнинг саъй-ҳаракатлари сабаб жабрланувчининг ҳаёти сақлаб қолинган. Аниқланишича, ҳамкасбини пичоқлаган йигит муқаддам 16 ёшга тўлмаган шахс билан жинсий алоқага киришгани учун судланган.
Жиноят ишлари бўйича Олмазор туман судида кўриб чиқилган ишда айбланувчи Жиноят кодексининг 104-моддаси (қасддан баданга оғир шикаст етказиш) 2-қисми “л” бандида назарда тутилган жиноятни содир этганликда айбдор деб топилди. Судланувчига узил-кесил 5 йил 6 ой муддатга озодликдан маҳрум қилиш жазоси тайинланган.
Пичоқлашиш ҳолатлари
Тошкент шаҳри Миробод туманида 11 март куни 11-синф ўқувчиси келишмовчилик сабаб синфдошини пичоқлаганди. Шунингдек, Бухоро вилояти Вобкент туманида маст фуқаро қайнукасини, Россияда ўзбекистонлик эркак маст танишининг қулоғини кесиб ташлагани, Наманган давлат университетида эркак ўз хотинини пичоқлаб ўлдиргани, Андижонда қўмиталарнинг бирида фаолият юритадиган шахснинг пичоқланиш сабаби очиқлангани тўғрисида хабар берилганди.
Изоҳ (0)