АҚШ президенти Дональд Трамп Канада бош вазири Марк Карни билан учрашувда келишмовчиликларга қарамай, мамлакатлар ўртасидаги муносабатлар дўстона хусусиятини сақлаб қолишини тасдиқлади. Уларнинг нутқи Оқ уй томонидан жонли тарзда узатилди.
“Биз ҳар қандай ҳолатда ҳам Канада билан дўст бўлиб қоламиз. Бу мен учун жуда алоҳида аҳамиятга эга жой. У ерда менинг кўплаб танишларим бор, Канадада онамнинг қариндошлари бўлган”, деди Трамп.
У канадаликларни ҳурмат қилишини ва “Канадани жуда яхши кўришини” қўшимча қилган. Шунингдек, икки давлатнинг бошқа мамлакатлардан ажралиб турадиган “улкан салоҳияти” борлигини айтган. Унинг сўзларига кўра, АҚШ адолатли келишувларга тайёр, бироқ энди “ўзини алдашга йўл қўймайди”.
Америка раҳбари учрашув давомида мамлакатнинг АҚШга қўшилиши мавзусини яна кўтарган.
“Мен ҳали ҳам бунга эришиш мумкинлигига ишонаман. Аммо, биласизми, танго учун икки киши керак”, дея ҳазиллашди у, Канадани 51-штат қилиш ғоясини эслатиб.
Бунга жавобан Марк Карни Оттаванинг расмий нуқтайи назарини такрорлади.
“Канада - товар эмас. Биз сотилмаймиз ва ҳеч қачон сотилмаймиз”, деди Карни.
Канада бош вазирининг қўшимча қилишича, Оттава ҳукумати Вашингтон раҳбарияти билан иқтисодий муносабатларни ҳамкорлик сифатида кўради ва алоқаларни, жумладан хавфсизлик ва мудофаа соҳаларида чуқурлаштириш ниятида.
“Вақт кўрсатади, лекин мен доим айтаман: ҳеч қачон “ҳеч қачон” деманг. Имконсиз бўлиб туюлган кўп нарсалар охир-оқибат амалга ошади ва фақат дўстона муҳитда”, деди Трамп Карни билан учрашувда.
Трамп Канада Қўшма Штатлар таркибига кириши кераклигини бир неча бор таъкидлаган. Хусусан, у Канада АҚШнинг 51-штати сифатида “анча яхшироқ” бўлишини айтган.
Шунингдек, сиёсатчи унинг мамлакати Канада туфайли ҳар йили 200 миллиард доллар йўқотаётганини ва бунинг давом этишига йўл қўймаслигини таъкидлаган. Бундан ташқари, Трамп Канаданинг АҚШ таркибига кириши ҳақида фикр билдирганида, канадаликлар учун солиқлар ва мудофаа соҳасида сезиларли тежамкорлик афзаллик бўлиши мумкинлигини айтган.
Изоҳ (0)