Қозоғистоннинг Олмаота аэропортида пичоқ кўтарган йўловчи ходимни гаровга олди. Бу ҳақда “Закон.кз” хабар берди.
Ҳодиса 7 март куни соат 11:45 атрофида ички рейслар терминалида содир бўлган. Аэропорт маълумотларига кўра, эркак йўловчи қиёфасида парвоздан олдинги текширув зонасига яқинлашган. Ходимлар ҳужжатларини кўрсатишни сўраганида, у тўсатдан ходимни ушлаб олиб, унга пичоқ билан таҳдид қила бошлаган.
Таъкидланишича, 7 дақиқадан сўнг эркак полиция ва авиация хавфсизлиги ходимлари томонидан қуролсизлантирилган. Ҳозирда у қўлга олинган, ҳодиса ҳуқуқни муҳофаза қилувчи органлар томонидан ўрганилмоқда.
Дунё бўйлаб январь февраль ойларида бир қатор пичоқбозликлар ва одамларни қасддан босиб кетиш ҳолатлари кузатилди:
20 февраль куни Чехияда савдо марказидаги пичоқбозликда икки аёл ҳалок бўлди. Гумонланувчи 16 ёшли ўсмир. У воқеадан ўн дақиқа ўтиб қўлга олинган. Полиция маълумотларига кўра, иккала қурбон ҳам ҳужум содир бўлган дўконда ишлаган. Ҳужум сабаби ҳозирча номаълум, тергов давом этмоқда.
16 февраль куни Австрияда суриялик эркак ўткинчиларни пичоқлади. Ҳужум оқибатида 14 ёшли ўсмир ҳалок бўлди ва яна 5 киши жароҳат олди, улардан икки нафари оғир аҳволда. Жиноятчини қўлга олишда яқин атрофда бўлган суриялик курер муҳим рол ўйнади. У янги қурбонларнинг олдини олиш учун ҳужум қилган эркакни атайлаб машинасида уриб юборди.
13 февраль куни Германияда афғонистонлик муҳожир оломонни машинада босиб кетди. Оқибатда 28 киши жароҳат олди, улар орасида болалар ҳам бор. Жабрланганларнинг камида биттаси оғир аҳволда.
31 январь Россияда эркак поезд йўловчиларига пичоқ билан ҳужум қилди. Оқибатда эркак ва аёл жароҳатланди. Йўловчилар вагондан эвакуация қилинган, эркак эса қўлга олинган.
22 январь Германияда афғонистонлик эркак одамларга пичоқ билан ҳужум қилди. Қурбонлар 41 ёшли эркак ва 2 ёшли ўғил бола бўлган. Бундан ташқари, полиция хабарида икки нафар оғир ярадор шифохонага жойлаштирилгани айтилган.
22 январь Тель-Авивда пичоқ билан қуролланган эркак одамларга ҳужум қилди. Ҳодиса оқибатида 4 киши жароҳат олган. Ҳужум қилган шахс 2022 йилдан бери АҚШ резиденти ҳисобланган марокашлик Қоди Абдел Азиз экани айтилмоқда. У зарарсизлантирилган.
14 январь Красноярск халқаро аэропортида ўзбекистонлик эркак пичоқ билан одамга ҳужум қилди. Ўзбекистон фуқароси маст ҳолда бўлганини айтган, жабрланувчи шифохонага ётқизилган.
Изоҳ (0)