Хитойнинг Юннан провинциясида пичоқ билан қуролланган номаълум эркак касалхонадаги одамларга ҳужум қилди. Бу ҳақда CNN хабар берди.
Ҳодиса 7 май куни маҳаллий вақт билан соат 11:37 да Чжэн Сюнь округидаги касалхонада содир бўлган. Ҳужум оқибатида икки киши ҳалок бўлган, 21 киши яраланган. Барча жабрланганлар касалхонага ётқизилган. Гумонланувчи Поцзи қишлоғида яшовчи шахс бўлиб чиққан. Ҳолат юзасидан тергов давом этмоқда.
Эслатиб ўтамиз, 2023 йил Хитой жануби-шарқидаги Гуандун провинциясида номаълум шахс болалар боғчасига пичоқ билан ҳужум қилганди. Оқибатда олти киши ҳалок бўлган: бир тарбиячи, икки ота-она ва уч нафар тарбияланувчи, бир киши яраланган.
2021 йилда Хитой жанубидаги Гуанси-Чжуан автоном туманидаги болалар боғчасига бир эркак пичоқ билан ҳужум қилганди. Оқибатда 18 киши жароҳатланган — 16 бола ва икки ўқитувчи.
2018 йилда Хитойнинг Шэньси провинциясида номаълум шахс ўрта мактаб ўқувчиларига ҳужум қилиши оқибатида етти нафар ўқувчи ҳалок бўлган, яна 12 нафари жароҳатланган. Қотил қўлга олинган.
Изоҳ (0)