Россиянинг Ижевск шаҳрида мактаб ўқувчиси синфдошига бир неча марта пичоқ урди. Бу ҳақда “News.ру” хабар берди.
Россия Тергов қўмитаси маълумотларига кўра, ҳодиса дарс вақтида содир бўлган. 14 ёшли 8-синф ўқувчиси дўстига пичоқ билан ҳужум қилган. Шундан сўнг жабрланувчи касалхонага ётқизилган. Ўсмирнинг аҳволи оғир деб баҳоланмоқда.
“Айни дамда унга тиббий ёрдам кўрсатилмоқда”, — дейилади бошқарма хабарида.
Воқеа жойида терговчилар иш олиб борди. Улар воқеа жойини кўздан кечиришди ва гувоҳлар билан суҳбатлашди. Айни пайтда ҳуқуқ-тартибот идоралари ходимлари ҳодисанинг барча ҳолатларини аниқламоқда.
2022 йилнинг кузида Ижевск шаҳридаги мактабда отишма содир этилганди. Бинога ушбу мактабнинг 34 ёшли битирувчиси ҳужум қилиб, 17 кишини, жумладан, 11 болани ўлдирган ва 20 дан ортиқ одамни жароҳатлаган, шундан сўнг у ўз жонига қасд қилган. Удмуртия расмийларига кўра, ҳужум қилган эркак психоневрологик диспансерда рўйхатга олинган.
Изоҳ (0)