АҚШнинг Нью-Жерси штатидаги масжидда туркиялик эркак имомни пичоқлади. Бу ҳақда Аl Arabia хабар берди.
Маълум қилинишича, пичоқлаганликда айбланаётган эркак қотилликка уриниш айбини тан олмаган. Шариф Зорба исмли гумонланувчи Патерсон шаҳридаги Умар масжидида бомдод намози пайтида имом Сайид Элнақибни пичоқлагани учун қўлга олинган. Имомга ҳужум 9 апрель, шанба куни содир этилган.
Кузатув камерасига муҳрланган тасвирга кўра, намоз ўқилаётган пайтда 32 ёшли эркак учинчи қаторнинг ўртасидан чиқиб, имомга орқадан яқинлашиб, уни пичоқлаган.
Имомнинг соғлиғи ҳозирда барқарор. Айбланувчи қочаётган пайти намозхонлар томонидан қўлга олинган. Зорба қотилликка уринишда ва ноқонуний қурол сақлашда айбдор эмаслигини айтмоқда. У ҳозирда тергов ҳибсхонасида сақланмоқда. Унинг навбатдаги суд мажлиси 14 апрель куни бўлиб ўтиши режалаштирилган.
“Ҳужум ортидаги сабаб номаълумлигича қолмоқда ва тергов давом этмоқда”, — дейилади хабарда.
Прокуратура давом этаётган терговга таяниб, Зорбанинг ҳужуми сабаблари ҳақида қўшимча маълумот бера олмаслигини билдирди. Агар Зорба айбдор деб топилса, у 26 йиллик қамоқ жазосига ҳукм қилиниши мумкин.
Изоҳ (0)