Россиянинг Ленинград вилояти Всеволожск туманида қидирувда бўлган ўзбекистонлик йигит қўлга олинди. У ҳамюртини пичоқлаб ўлдиришда айбланмоқда. Бу ҳақда 78.ru хабар берди.
Маълум қилинишича, 30 октябрга ўтар кечаси Садовий кўчасидаги 42-уй ёнидан турли тан жароҳатлари олган икки ўзбекистонлик эркак топилган. Улардан бири 31 ёшда бўлиб, Мариинск шифохонасида пичоқдан олган жароҳати оқибатида вафот этган. Иккинчиси эса 32 ёшда бўлиб, ўртача оғирликдаги жароҳатлар билан касалхонага ётқизилган. Ҳолат юзасидан жиноий иш қўзғатилган.
Уларга ҳужумда гумон қилинган 25 ёшли ўзбекистонлик муҳожир ноябрь ойи бошида федерал қидирувга берилган ва сиртдан ҳибсга олинган. 13 январь куни Кудроводаги Столичная кўчасидаги хонадонлардан бирида у қўлга олинган.
Аниқланишича, 30 октябрь куни йигит Бринко-лейндаги «Фарғона чойхонаси» кафеси ҳудудида бўлиб, тўсатдан келиб чиққан жанжал чоғида икки эркакка пичоқ билан камида уч марта зарба берган, оқибатда улардан бири вафот этган.
Изоҳ (0)