Жиззах вилояти Арнасой туманида эр рашк сабаб аввал хотинини кейин эса ўзини пичоқлади. Бу ҳақда Ички ишлар вазирлиги ахборот хизмати хабар берди.
Хабарга кўра, ҳолат 17 март куни Арнасой тумани “Олтинводий” маҳалласида содир бўлган. Шу маҳаллада яшовчи 1991 йилда туғилган фуқаро билан 28 ёшли турмуш ўртоғи ўртасида рашк сабаб жанжал келиб чиққан. Оқибатда эркак ошхона пичоғи билан дастлаб аёлига, кейин эса ўзига жароҳат етказган.
Қайд этилишича, ҳодиса сабабли 2 нафар вояга етмаган фарзанднинг онаси воқеа жойида вафот этган. Эркак эса туман тиббиёт бирлашмасининг жонлантириш бўлимига ётқизилган.
Аввалроқ Сирдарё вилоятининг Янгиер шаҳрида ҳам шу каби ҳолат кузатилган эди. 2 март куни соат 08:20 ларда Янгиер шаҳар тиббиёт коллежи ҳовлисида фуқаро Р.У. коллежнинг иккинчи босқич талабаси бўлган турмуш ўртоғи Д.У.ни оилавий келишмовчилик негизида қасддан ўлдириш мақсадида ўзи билан олиб келган ошхона пичоғи билан унинг ўнг бўйин, ўнг ва чап кўкрак, чап оёқ болдир соҳаларига жами етти маротаба уриб, қасддан ўлдирган. Шундан сўнг эр жавобгарликдан қочиш мақсадида қўлидаги пичоқ билан ўзининг бўйин ва кўкрак соҳаларига икки маротаба уриб, ўзига ўзи оғир тан жароҳатлари етказган.
Изоҳ (1)
Ахмокгарчилик