Европа Иттифоқи Россияга қарши санкцияларни сақлаб қолиш учун “Б режа”ни ишлаб чиқмоқда. Бу режа Трамп маъмурияти Украинадаги тинчлик музокараларидан чиққан тақдирда амалга ошади. Бу ҳақда ЕИ ташқи сиёсат бўлими раҳбари Кая Каллас Financial Times нашрига берган интервьюсида маълум қилди.
Европа расмийлари фикрича, АҚШ “Украинани тарк этиб”, Россия билан келишув тузишга ҳаракат қилмоқда. Сабаби музокаралар жараёни жуда қийин тус оляпти. “Б режа” эса Россияга иқтисодий босимни давом эттиришга қаратилган.
“Б режа” ҳам бор, лекин “А режа” асосида ҳаракат қилишимиз керак, акс ҳолда “Б режа”га эътиборни қаратиб қўясиз ва у ҳақиқатга айланади, дея тушунтирди Каллас.
У АҚШ ва бошқа ҳамкорлар билан Россияга қарши санкциялар режимини сақлаб қолиш юзасидан музокаралар давом этаётганини айтди.
Европанинг баъзи давлатлари АҚШ агар Украинадан “воз кечса” ва Россия билан муносабатларни қайта тикласа, унга эргашиш керакми ёки йўқлиги муҳокама қилинмоқда. Улар “энди Украинани қўллаб-қувватламасликларига” умид қилмоқда, деди Каллас ва бу фикрни “ёлғон умид” деб атади.
Европа дипломатияси раҳбари агар АҚШ ўйиндан чиқадиган бўлса, ЕИ Украинага молиявий ёрдам кўрсатиши мумкинлигини айтди. Лекин америкаликларсиз Киев ҳарбий таъминотидаги бўшлиқларни тўлдириш осон бўлмаслигини таъкидлади. Каллас уруш оқибати АҚШга ҳам таъсир қилишини айтди. У Европа АҚШни бунга ишонтиришда давом этаётганини билдирди.
Шунингдек, у ЕИнинг ҳеч бир давлати Қримни Россияники деб тан олмаслигини маълум қилди. Бу аввалроқ Вашингтонда муҳокама қилинган ва Киевда қатъиян рад этилган эди.
Европага келсак, қайта-қайта такрорлайман... Қрим — бу Украина. Америкаликлар қўлида бу урушни тўхтатадиган ва Россияга босим ўтказиш учун ишлатиладиган воситалар бор. Трамп қотиллик тўхтатилишини истаётганини айтди. У қотиллик қилаётган одамга босим ўтказиши керак, дея қўшимча қилди Каллас.
Украинадаги урушни тўхтатиш бўйича Америка тақдим этган лойиҳада тинчлик музокаралари тугашидан олдин Россияга қарши санкцияларни юмшатиш банди бор эди.
Европа Иттифоқи ва Украина бу таклифни рад этди. Бунинг ўрнига, Москва ўт очишни тўхтатиш шартларини бузмаса, Россияга қарши чекловларни босқичма-босқич бекор қилишни назарда тутувчи бошқа лойиҳани илгари сурди.
Изоҳ (0)