Европа Иттифоқи 15 апрелдан АҚШдан олиб кириладиган айрим турдаги товарларга махсус йиғимлар жорий этади. Қарор АҚШ президенти Дональд Трамп май ойида жорий этган тарифларга жавобан қабул қилинмоқда. Бу ҳақда Еврокомиссияга таяниб, Deutsche Welle хабар берди.
Евроиттифоқнинг божлари дастлаб Америка жинсилари, виски, ерёнғоқ мойи, мотоцикллар ва бошқа товарларга нисбатан қўлланади.
Бизнинг энг муҳим ҳамкоримиз бўлган АҚШ билан ҳозирги савдо муносабатларимиз мураккаб аҳволда. Тарифлар Европа Иттифоқи экспортининг катта қисмига таъсир қилади. Евроиттифоқнинг АҚШга экспорти 380 миллиард еврони ташкил этади. Яъни экспортимизнинг деярли 70 фоизи мавжуд тарифлар билан қўшиб ҳисоблаганда 20 ёки 25 фоиз ёки ундан ҳам юқори бўлган тарифларга дуч келмоқда... Масалан, енгил автомобиллар учун божлар 27,5 фоизни ташкил этади, дейди Савдо ва иқтисодий хавфсизлик масалалари бўйича еврокомиссар Марош Шефчович.
У Европа Иттифоқи АҚШ билан музокаралар столига у тайёр бўлган заҳоти ўтиришини айтди, аммо блок “чексиз кутиб ўтирмайди”.
Сезиларли натижаларни кўрмагунимизча, биз уч йўналишда иш олиб борамиз: қарши чоралар ёрдамида манфаатларимизни ҳимоя қилиш, янги битимлар орқали савдомизни хилма-хил қилиш ва зарарли савдо оғишларининг олдини олиш, деди Шефчович.
Режаларга кўра, янги божлар АҚШдан қишлоқ хўжалиги маҳсулотларига, хусусан, парранда гўшти, мол гўшти, баъзи денгиз маҳсулотлари, ёнғоқлар, тухум, сут маҳсулотлари, шакар ва сабзавотларга таъсир қилади. Бундан ташқари, рўйхатга тўқимачилик каби баъзи саноат маҳсулотлари, шунингдек, чарм маҳсулотлари, маиший техника, асбоблар, пластмасса ва ёғоч кириши мумкин. Ушбу чора-тадбирлар пакети ишлаб чиқиш босқичида.
Европа Иттифоқининг АҚШ импорт божларига қарши чораларининг бир қисми 15 апрелдан, қолганлари эса 15 майдан кучга киради. АҚШ президенти Дональд Трамп ўзи жорий қилган божларга жавоб чоралари кўрадиган давлатлар янада каттароқ божларга дуч келишини айтганди.
Трампнинг савдо сиёсати
АҚШ президенти томонидан дунё товарларига нисбатан божлар 2 апрель куни эълон қилинди. Унга кўра, Ўзбекистон маҳсулотларига 10 фоизлик бож белгиланган, айрим мамлакатлар учун эса бу кўрсаткич 50 фоизга етган. Мазкур чоралар жаҳон иқтисодиётида секинлашув хавотирларини кучайтирди.
Инвесторлар анъанавий хавфсиз активлар, жумладан, олтинга сармоя киритишни бошлаган. Натижада 3 апрель куни тарихда илк бор олтин нархи бир унсия учун 3200 доллардан ошган. Хитой жавобан АҚШ маҳсулотларига 34 фоизлик бож жорий этган.
Трамп 12 мартдан бошлаб Европа Иттифоқидан 28 миллиард долларлик пўлат ва алюминий импортига 25 фоизлик бож белгилаган эди. Шу куни Европа комиссияси раҳбари Урсула фон дер Ляйен иттифоқ томонидан 26 миллиард долларлик “кучли, аммо мутаносиб” қарши чораларга тайёрланаётганини эълон қилган.
Изоҳ (0)