Хитой ҳукумати Украинадаги эҳтимолий тинчликпарвар миссияда иштирок этиш имкониятини кўриб чиқмоқда. Бу ҳақда Европа иттифоқининг дипломатик доираларидаги ишончли манбаларга таяниб, Weltаm Sonntag газетаси хабар берди.
Нашр манбаларига кўра, хитойлик дипломатлар Брюсселда европалик ҳамкасблари билан маслаҳатлашиб, Хитойнинг Франция ташаббуси билан тузилган “иштиёқмандлар коалицияси”даги иштироки масаласини синчиклаб ўрганган. Уларни Европа давлатлари бундай қадамга ижозат бериши ёки йўқлиги қизиқтирган.
Хитойнинг “иштиёқмандлар коалицияси”га қўшилиши Россиянинг Украинада тинчликпарвар кучлар бўлишига розилик бериш эҳтимолини ошириши мумкин, дея таъкидлади Брюсселдаги манбалар.
Улар ҳар қандай ҳолатда ҳам бу “нозик” масала эканини қайд этди. Бундан олдин Франция президенти Эммануэл Макрон 27 март куни Украина тарафдорларининг навбатдаги саммити ўтказилишини эълон қилган эди.
Келаси пайшанба куни биз “Иштиёқмандлар коалицияси” (Украинага тинчликпарвар кучлар юбормоқчи бўлганлар) саммитини ўтказамиз. Менинг асосий мақсадим Украинани қисқа муддатда қўллаб-қувватлаш бўйича такрорий, аниқ ва, эҳтимол, бир оз батафсил мажбуриятни олишдан иборат бўлади, деди у 20 март куни Брюсселда бўлиб ўтган ЕИ саммитидан сўнг.
Украинага хорижий контингентни юбориш масаласи
Россия билан уруш тугаганидан кейин Украинага тинчликпарвар кучларни юбориш миссиясига Буюк Британия ва Франция бошчилик қилмоқда. Туркия, Канада ва Австралия ушбу мақсадлар учун ўз қўшинларини ажратишга аллақачон рози бўлгани айтилмоқда. Яна 30 дан ортиқ давлат миссияни, жумладан, қурол-яроғ ва моддий-техник жиҳатдан қўллаб-қувватлашга тайёр.
Украинага 30 минггача тинчликпарвар кучларни юбориш масаласи муҳокама қилинмоқда. Британия ўз ҳарбийларини муддатсиз жойлаштиришни режалаштирмоқда, яъни “тинчлик битимини сақлаб қолиш ва Россияни ушлаб туриш учун қанча керак бўлса, шунча”. 27 март куни коалиция мамлакатлари мажбуриятларнинг тафсилотларини муҳокама қилиш учун яна йиғилади.
Бу орада Хитой ташаббусга эътибор қарата бошлади. Европа иттифоқи дипломатик доираларидаги манбаларга кўра, Пекин ўз дипломатлари орқали миссияда иштирок этиш масаласини кўтарган. Манбалар мазкур қадам Украинага тинчликпарвар кучларни юбориш эҳтимолини оширишини айтмоқда.
Россия қандай муносабатда?
Bloomberg агентлигининг Кремлдаги манбалари Россия президенти Владимир Путин тинчликпарвар кучлар сифатида айнан Хитой ёки бошқа “нейтрал” давлатлар қўшинларини кўришни истаётгани, Европа контингенти иштирокига қарши чиқаётганини маълум қилган. Ташқи ишлар вазири Сергей Лавровнинг тушунтиришича, Украинада НАТО кучларининг ҳар қандай байроқ остида пайдо бўлиши урушнинг “асосий сабаблари” йўқолмаганини англатади.
Изоҳ (0)