Европа Иттифоқи Россиядан эҳтимолий ҳужум хавфига тайёр туриш мақсадида қурол харид қилиш учун махсус фонд — European Defence Mechanism (EDM) ни ташкил этишни режалаштирмоқда. Бу ҳақда Reuters хабар берди.
Европа молия вазирлари ушбу масалани муҳокама қилишни режалаштирмоқда. Режага кўра, EDM қурол-яроғ харид қилади, ундан фойдаланган давлатлардан тўлов олади ва кредит ажратади. Фондга Европа Иттифоқига аъзо бўлмаган давлатлар, хусусан, Буюк Британия, Украина ёки Норвегия ҳам қўшилиши мумкин.
Мазкур лойиҳа Россиянинг эҳтимолий ҳужумига қарши тайёргарликни қандай молиялаштириш кераклиги юзасидан олиб борилаётган кенгроқ мунозараларнинг бир қисми саналади. Чунки Европа хавфсизлик масалаларида энди АҚШга тўлиқ таяниб бўлмаслигини англаб етмоқда.
Фонд давлат қарзи даражасини оширмаган ҳолда мудофаа учун катта ҳажмдаги маблағларни жалб этишга имкон яратади. Асосий эътибор стратегик қўллаб-қувватлаш воситаларига — ҳозирда АҚШ томонидан тақдим этилаётган қиммат инфратузилмалар ва ҳарбий жиҳозларга қаратилади. Жумладан, қўшма қўмондонлик, сунъий йўлдош разведкаси, 5 ва 6-авлод қирувчи самолётлари, ҳаво ҳужумидан мудофаа ва ядровий тўсиқ тизимлари шулар жумласидандир
EDM ташкил этиш ташаббуси ҳозирда Европа Иттифоқига раислик қилаётган Польшага тегишли. Польша буюртмасига кўра, Европадаги Bruegel таҳлил маркази лойиҳа тавсифини ишлаб чиққан. Ҳужжат 12 апрель куни Варшавада муҳокама қилинади.
Изоҳ (0)