Венгрия парламенти мамлакатнинг Халқаро жиноий суддан чиқишини маъқуллади. Бу ҳақда Венгрия ташқи ишлар вазири Петер Сийярто Х ижтимоий тармоғида хабар берди.
Сийяртонинг таъкидлашича, Венгрия ушбу қарор билан “холислик ва обрўсини йўқотган сиёсийлашган ташкилот”нинг бир қисми бўлишдан воз кечмоқда.
“Венгрия парламенти ХЖСдан чиқиш учун овоз берди. Ушбу қарор билан биз ўз холислиги ва нуфузини йўқотган сиёсийлашган ташкилотнинг бир қисми бўлишдан воз кечамиз”, дея ёзди дипломат.
Илгари мамлакат бош вазири Виктор Орбан Венгриянинг ХЖСдан чиқиш тўғрисидаги қарори ҳақида маълум қилганди. Унинг айтишича, бу суднинг сиёсий воситага айланганига боғлиқ бўлиб, бунга унинг Исроил бўйича сўнгги қарорлари ишора қилмоқда.
Бундан олдин, 3 апрель куни Исроил бош вазири Биньямин Нетаньяху ХЖС қарорини эътиборга олмай, Венгрияга ташриф буюрган эди. Сиёсатчининг Будапештга ташрифи суд томонидан қамоққа олиш учун ордер берилганидан кейинги биринчи хорижий сафари бўлди.
Ўз навбатида, Нетаньяху Венгриянинг бу қарорини жасур ва принципиал деб баҳолади.
Халқаро жиноий суд матбуот хизмати Венгриянинг қарорига изоҳ бериб, Будапешт ҳамкорлик бўйича мажбуриятлари сақланиб қолишини эслатди.
Кейинчалик Сийярто мамлакатнинг ХЖСдан чиқиши тўғрисидаги қонун лойиҳасини парламентга киритганини маълум қилди.
Изоҳ (0)