Гаагадаги Халқаро жиноий суд (ХЖС) Россия президенти Владимир Путинни “Вагнер” жиноятлари бўйича ҳибсга олиш учун янги ордерлар бериши мумкин. Бу ҳақда экспертларга таяниб, “Америка овози” хабар берди.
“‘Вагнер’ раҳбарининг исён кўтаришга уринишидан сўнг, Путин улар тўлиқ Россия бюджетидан молиялаштирилганини тан олди. Ушбу баёнот ХЖС прокурорлари учун ‘Вагнер’ томонидан содир этилган йирик ҳарбий жиноятларни тергов қилишга, бунда Россия раҳбарияти, жумладан, Путиннинг алоқаси борлигини текширишга имкон беради”, — дейилади хабарда.
ХЖС раиси Пётр Гоффманскийнинг сўзларига кўра, ҳибсга олиш учун янги ордерлар биринчи навбатда Халқаро жиноий суд прокурорининг ҳаракатларига боғлиқ.
“У ХЖСнинг дастлабки тергов судьяларидан ҳибсга олиш учун ордер беришни сўраши мумкин, улар бунга асослар бор ёки йўқлигини ҳал қилади. Лекин, албатта, прокурор Украинада ҳам, бошқа мамлакатларда ҳам янги тергов ишлари билан фаол шуғулланмоқда ва биз бу масала бўйича кўпроқ чоралар кўришини кутамиз”, — дейди Гоффманский.
Путинни ҳибсга олиш ордери
Нидерландиядаги Халқаро жиноят суди (ХЖС) геноцид, уруш жиноятлари, инсониятга қарши жиноятлар ва босқинчилик жиноятлари учун шахсларни жавобгарликка тортиш билан шуғулланади. ХЖС 17 март куни Россия президенти Владимир Путинни ҳибсга олишга ордер берди.
Халқаро жиноят судининг ҳибсга олиш ҳақидаги ордери Путиннинг ҳаракатланиш эркинлигини расман чеклайди. ХЖСга аъзо бўлган ва унинг юрисдикциясини қабул қилган 123 та давлат Владимир Путин уларнинг ҳудудига кириши биланоқ уни ҳибсга олиши талаб қилинади. Бундай давлатлар қуйидаги хаританинг яшил рангида кўрсатилган:
Халқаро жиноий судда сиртдан суд жараёни амалга ошириш мумкин эмас: судланувчига фақат экстрадиция қилинган тақдирдагина ҳукм чиқарилиши мумкин. Яъни Путиннинг иши судда кўриб чиқилиши учун у шахсан Гаагада бўлиши керак.
Германия Путин мамлакатга келса, ҳибсга олишини билдирган
Германия адлия вазири Марко Бушман Россия президенти мамлакатга келса, маҳаллий ҳокимият уни ҳибсга олиб, Халқаро жиноий суд вакилларига топширишини билдирган.
“Халқаро жиноят суди (ХЖС) тезкорлик билан Интерпол билан боғланади ва ижрони талаб қилади. Шундан сўнг Германия Путинни ҳибсга олишга ва Германия ҳудудига кирса, уни ХЖСга топширишга мажбур бўлади”, — деган Бушманн.
Австрия Путинни ҳибсга олишга тайёрлигини маълум қилди
Австрия Халқаро жиноий суд қарорини бажаришини ва Россия президенти Владимир Путин мамлакатга келса, уни ҳибсга олишини билдирди. Мамлакатнинг Европа Иттифоқи ва Конституция масалалари бўйича вазири Каролина Эдцҳтадлер бу ҳақда маълумот берган.
У Халқаро жиноий суд томонидан ҳибсга олиш тўғрисидаги буйруқ эълон қилиниши ва чиқиши Путин “Австрия тупроғига қадам қўйган бўлса, уни ҳибсга олиш керак” деган маънони англатишини таъкидлаган.
Арманистон Путинни ҳибсга олишни режалаштирмаяпти
Арманистон Путин мамлакатга ташриф буюрса, уни Халқаро жиноий судга топширишни режалаштирмаяпти. Арманистон парламенти вице-спикери Акоп Аршакян бу бўйича маълумот берган.
“Арманистон Конституциявий суднинг қарори ҳеч кимни ҳеч қандай масалада айбдор деб ҳисобламайди ва ҳеч кимни ҳибсга олиш чораларини талаб қилмайди”, — деган у.
ЖАР Путин мамлакатга келса, уни ҳибсга олишга рози бўлди
ЖАР расмийлари Россия президенти BRIKS саммитида қатнашмаслигини эълон қилганидан сўнг, мухолифатдаги Демократик альянс суддан Путинни мамлакатга келган исталган вақтда ҳибсга олишга буйруқ беришни сўраган. Ҳукумат бу талабга рози бўлган.
Изоҳ (0)