Ўзбекистон расмийларининг илтимосига биноан Бельгияда халқаро терговга жавобан 200 миллион доллар мусодара қилинган. Маблағларнинг бир қисми, яъни 108 миллион доллар Ўзбекистонга қайтарилади. Бу ҳақда Бельгия прокуратураси хабар берди.
Гап Ўзбекистон ҳуқуқ-тартибот идоралари томонидан коррупция ва пул ювиш бўйича олиб борилаётган тергов доирасида Бельгияда музлатиб қўйилган маблағлар ҳақида кетмоқда. У телекоммуникация шартномаларини тузиш жараёнида ноқонуний йўллар билан олинган воситачилик пуллари ҳисобланади.
Брюссел Қироллик прокурори 28 март куни 108 миллион долларни Бельгия давлат ғазнаси ҳисоб рақамига ўтказиш тўғрисида сўров юборган. Кейинчалик Брюссел прокуратураси ушбу маблағларни икки давлат ўртасида тақсимлашга қарор қилган. Бундай усул Европа иттифоқига аъзо давлатлар ўртасида мусодара қилинган даромадларни тақсимлашда қўлланилади. Натижада Ўзбекистонга 108 миллион доллар ўтказилади.
Бу Гулнора Каримованинг пулларими?
Бельгия прокуратураси бу маблағлар манбасини очиқламаган. 2022 йилда адлия вазири ўринбосари Музраф Икромов Бельгия қироллигида Гулнора Каримовага алоқадор жиноий уюшган гуруҳга тегишли 240 миллион АҚШ долларилик активлар мавжудлигини айтган эди.
“Гулнора Каримова ва у бошчилигидаги жиноий гуруҳнинг ноқонуний ўзлаштирган бойликлари умумий ҳисобда 1 миллиард 400 миллион АҚШ долларига тенг. Бу миллий валютада 15 триллион сўм дегани. Ҳисоб-китобларга кўра, бунча миқдордаги пулларга 1 минг 400 та мактаб қурса бўларкан. Масалан, 2020-2021 йилларда Францияда жиноий гуруҳнинг кўчмас мулклари (2 та катта қаср) сотилиши натижасида 20 миллион АҚШ долларига тенг пул маблағи Ўзбекистонга қайтарилди”, деган эди вазирлик расмийси.
Юқоридаги маблағлар Гулнора Каримовага тегишли ёки тегишли эмаслиги ҳақида ахборот йўқ. Адлия вазирлиги ахборот хизмати ҳам бу бўйича ҳозирча маълумот йўқ эканини билдирди.
Изоҳ (0)