Республикачилар партияси вакили Майкл Маккол бошчилигидаги АҚШ Конгрессининг юқори мартабали делегацияси Гаагадаги Халқаро жиноят суди бош прокурори Карим Хон билан учрашиб, Россия президенти Владимир Путинга қарши ҳарбий жиноятлари айбловларини муҳокама қилади. Бу ҳақда Reuters хабар берди.
Макколнинг таъкидлашича, Вашингтон “Путинга қарши айбловларни исботлаш учун Гаагага кўпроқ далил ва разведка маълумотларини тўплашда ёрдам бериш” масаласини кўриб чиқади. АҚШ халқаро Гаага суди аъзоси эмас, Хитой ва Россия ҳам.
Шу билан бирга, Оқ уй раҳбари Жо Байден аввалроқ ўз маъмуриятидан Россиянинг Украинадаги уруш жиноятлари ҳақидаги далилларни Халқаро суд билан бўлишишни сўраган. Россияни геноцидда айблаш учун етарли далиллар борми, деган саволга делегация аъзолари вазиятни Иккинчи жаҳон уруши давридаги фашистларнинг Европани босиб олгани билан қиёслаган.
“Маданият, халқ ва динни йўқ қилишга ҳаракат қилсангиз, бу геноциднинг таърифидир”, — деди Маккол.
Март ойида Халқаро Гаага суди Путинни ҳибсга олиш учун ордер берди ва уни Украинадан юзлаб болаларни ноқонуний депортация қилиш билан боғлиқ ҳарбий жиноятда айблади. Россия ҳарбий жиноятларда иштирок этгани ёки украиналик болаларни зўрлик билан асирга олганини бир неча бор рад этиб келади.
Путинни ҳибсга олиш ордери
Нидерландиядаги Халқаро жиноят суди (ХЖС) геноцид, уруш жиноятлари, инсониятга қарши жиноятлар ва босқинчилик жиноятлари учун жавобгар шахсларни жавобгарликка тортиш билан шуғулланади. ХЖС 17 март Россия президенти Владимир Путинни ҳибсга олишга ордер берди.
Халқаро жиноят судининг ҳибсга олиш ҳақидаги ордери Путиннинг ҳаракатланиш эркинлигини расман чеклайди. ХЖСга аъзо бўлган ва унинг юрисдикциясини қабул қилган 123 та давлат Владимир Путин уларнинг ҳудудига кириши биланоқ уни ҳибсга олиши талаб қилинади. Бундай давлатлар қуйидаги хаританинг яшил рангида кўрсатилган:
Халқаро жиноий судда сиртдан суд жараёни амалга ошириш мумкин эмас: судланувчига фақат экстрадиция қилинган тақдирдагина ҳукм чиқарилиши мумкин. Яъни Путиннинг иши судда кўриб чиқилиши учун у шахсан Гаагада бўлиши керак.
Изоҳ (0)