Гаагадаги Халқаро суд судьяси сифатида 2015 йилдан бери фаолият кўрсатиб келаётган Россия вакили Кирилл Геворгян иккинчи муддатга қайта сайланмади. БМТ Бош ассамблеясида бўлиб ўтган овоз бериш чоғида у ассамблеянинг 117 нафар аъзоси қўллаб-қувватлаган Руминия вакили Богдан-Лучиан Аурескуга ютқазди, деб хабар беради DW.
Совет иттифоқи ва Россия судьялари 1946 йилдан бери БМТ суд органи таркибида бўлиб келаётган эди. Шу тариқа, биринчи марта БМТ Халқаро судида Россия вакили бўлмайди.
Аурескудан ташқари яна уч янги судья —Сара Халл Кливленд (АҚШ), Хуан Вердуско (Мексика) ва Дире Тлади (Жанубий Африка) БМТ Халқаро судига сайланди, амалдаги судья, Австралия вакили Хилари Чарльзуорт эса қайта сайланди.
БМТ Халқаро суди 15 судьядан иборат бўлиб, уларнинг ваколат муддати — тўққиз йил. Шу билан бирга, бўш қолган беш ўрин учун ҳар уч йилда бир марта сайловлар ўтказилади. Кетма-кет бир неча муддат ишлаш учун ҳеч қандай тақиқ йўқ.
Эслатиб ўтамиз, октябрь ойида Арманистон парламенти Гаагадаги Халқаро жиноий суднинг Рим статутини ратификация қилиш учун овоз берганди. Россия Арманистонда Рим статути ратификация қилинишига фаол қарши чиқди — улар ХЖС Владимир Путин ва Мария Лвова-Беловани ҳибсга олишга ордер берган бир пайтда Ереваннинг бундай қарори номақбул деб аталди.
Изоҳ (0)