Исроил бош вазири Биньямин Нетаньяху 2 апрель куни унга нисбатан ҳибсга олиш ордери амал қиладиган Венгрияга ташриф буюради. Amnesty International ушбу ташриф муносабати билан Нетаньяхуни ҳибсга олишга чақирди.
Ташриф Венгрия бош вазири Виктор Орбаннинг таклифига биноан амалга ошмоқда. Ноябрь ойида Халқаро жиноий суд (ХЖС) Исроилнинг Ғазодаги ҳаракатлари юзасидан Нетаньяхуни ҳибсга олишга ордер берганди. Бироқ, Орбан ушбу ордерни бажармаслигини билдирган. Шунга қарамай, Венгрия ХЖС аъзоси сифатида ҳар қандай ҳибсга олиш ордерини бажаришга мажбур.
Нетаньяху очликдан уруш қуроли сифатида фойдаланиш, тинч аҳолига қасддан ҳужум уюштириш ва инсониятга қарши жиноятлар, жумладан, қотиллик, таъқиб ва бошқа ғайриинсоний ҳаракатларда айбланаётган гумондор ҳарбий жиноятчи, дейди Amnesty International’нинг глобал тадқиқотлар, тарғибот ва сиёсат бўлими раҳбари Эрика Гевара-Росас.
ХЖС аъзоси сифатида Венгрия Нетаньяху мамлакатга келган тақдирда уни ҳибсга олиб, судга топшириши шарт.
Нетаньяхунинг ташрифини ХЖС ва унинг фаолиятига путур етказишга қаратилган сурбетона уриниш, шунингдек, жиноят қурбонларига нисбатан ҳақорат сифатида баҳолаш керак, чунки улар суддан адолат кутмоқда. Венгриянинг таклифи халқаро ҳуқуққа ҳурматсизлик бўлиб, ХЖС томонидан қидирилаётган гумондор ҳарбий жиноятчиларнинг Европа иттифоқига аъзо давлатида эркин юриши мумкинлигини тасдиқлайди, деди Гевара-Росас.
У Исроил бош вазирининг Венгрияга ташрифи Европада инсон ҳуқуқлари келажагини белгиловчи омил бўлмаслиги кераклигини таъкидлади. Amnesty International Европа ва жаҳон етакчиларини Венгрияни Нетаньяхуни ҳибсга олишга чақиришга ундади.
Европа ва жаҳон етакчилари шармандали жим туриш ва ҳаракатсизликни тўхтатиб, Венгрияни Нетаньяхуни ташриф пайтида ҳибсга олишга чақиришлари лозим. Бу ташриф Исроилнинг Ғазодаги геноциди қурбони бўлган фаластинликларнинг азоб-уқубатлари, босиб олинган Фаластин ҳудудининг бошқа қисмларидаги ҳарбий жиноятлари ва фаластинликларга нисбатан апартеид тизими устидан кулиш бўлади. Amnesty International ХЖС прокурорини барча исроиллик жиноятчиларни тергов қилиш ва жавобгарликка тортишга чақиради, дейилади хабарда.
Гевара-Росас ҳарбий ва инсониятга қарши жиноятларда айбланаётган Нетаньяху каби нуфузли раҳбарлар абадий жазосиз қолиш имкониятидан завқланмаслиги кераклигини қайд этди. The Times of Israel нашри ёзишича, Нетаньяху Венгрияга ташриф давомида Ғазо секторидаги фаластинликларни ўз хоҳишига кўра кўчиришни муҳокама қилиши мумкин.
Изоҳ (0)