Чеченистон раҳбари Рамзан Қодировнинг 17 ёшли ўғли Адам Араб арбитраж суди аъзоси бўлди. Бу ҳақда “РБК” хабар берди.
Тегишли гувоҳнома Қодировнинг ўғлига Чеченистон вакиллари делегацияси таркибида Мисрга ташрифи чоғида топширилган. Қабул Араб арбитраж суди қароргоҳида бўлиб ўтган.
Ташрифнинг муҳим натижаларидан бири Адам Қодировга муддатсиз Араб арбитраж суди аъзоси гувоҳномасининг топширилиши бўлди. Шунингдек, унга ‘Ливиянинг фахрий меҳмони’ медали топширилди, деди Рамзан Қодиров.
Ташриф мақсади турли соҳаларда инвестициявий ҳамкорликни ривожлантириш ва Араб арбитраж суди доирасидаги халқаро шериклик масалаларини муҳокама қилиш бўлган.
Араб давлатлари лигасининг муҳим иқтисодий органларидан бири — Араб иқтисодий бирлиги кенгаши бўлиб, у 1964 йилда ташкил этилган. Унинг бош қароргоҳи Қоҳирада жойлашган. 2021 йилда кенгаш ҳузурида ҳам юридик шахслар ўртасидаги, ҳам давлатлараро даражада тижорий, иқтисодий, инвестициявий низоларни ҳал қилувчи инстанция — Араб арбитраж суди ташкил этилди.
Араб давлатлари лигаси ташкилоти ташкил топганидан буён кўплаб минтақавий урушларнинг гувоҳи бўлди. Ташкилот араб мамлакатлари ва Исроил ўртасидаги муносабатларни яхшилаш ва низога барҳам бериш борасида кўп саъй-ҳаракат қилган бўлса-да, айрим уринишлар муваффақиятсиз якунланди.
Адам Қодиров
Рамзан Қодировнинг ўғли 17 ёшда. 2024 йил декабрь ойи бошида унга Кавказ урушининг фаол иштирокчиси, чечен қўмондони, ноиб Имамат Байсунгур Беноевский ордени абадий сақлаш учун берилган. Ўша йилнинг август ойи охирида унга республиканинг олий мукофоти — Аҳмад Қодиров ордени топширилган.
2023 йил октябрь ойида эса Чеченистон Қаҳрамони унвони берилган. Бу ўсмир (ўша пайтда у 15 ёшда эди) Грозний қамоқхонасида Қуръонни ёқиб юборганликда айбланган Никита Журавелни калтаклаганидан кейин содир бўлган. Калтаклаш билан боғлиқ жиноий иш “жиноят ҳодисаси йўқлиги” сабабли қўзғатилмаган.
Қодировнинг ўғлида яна бир қанча мукофотлар бор. Бундан ташқари, у Чеченистон раҳбари хавфсизлик хизматида бўлим бошлиғи ҳисобланади.
Изоҳ (0)