Россия президенти Владимир Путин 11 октябрь куни Махтумқули Фироғий таваллудининг 300 йиллигига бағишланган халқаро форумда иштирок этиш учун Ашхободга келди. Украина ташқи ишлар вазири бунга кескин муносабат билдирди.
Украина Туркманистон раҳбарияти Путин ҳарбий жиноятчи эканлигини англаб етишига умид қилмоқда, унга Украина болаларини Россияга ноқонуний равишда олиб ўтгани учун ХЖС томонидан ҳибсга олишга ордер берилган. Бу Кремль раҳбарларининг бир қатор жиноятларидан бири, холос.
Путин ва унинг шериклари Украинага қарши тажовуз, ҳарбий жиноятлар, инсониятга қарши жиноятлар, геноцид, қотиллик, қийноқлар, зўрлаш, талончилик, фуқаролик инфратузилмасини ўққа тутиш ва бошқа ваҳшийлик учун жавоб беради. Уларнинг барчаси ўз жиноятлари учун одил судловга тортилиши керак.
Инсон ҳаёти, халқаро ҳуқуқни ва БМТ Низомини қадрлайдиган барча мамлакатларни Иккинчи жаҳон урушидан бери кузатилмаган миқёсда Европада уруш бошлаган ва қўллари тирсагигача қонга беланган Путиннинг иштирокида умумий тадбирлар ўтказишдан тийилишга чақирамиз, дейилади ТИВ баёнотида.
Халқаро жиноий суди (ХЖС) 2023 йил март ойида Украинанинг босиб олинган ҳудудларидан аҳолини болаларни Россияга ноқонуний депортация қилишда гумон қилиб, Путинни ҳибсга олиш учун ордер берганди.
Туркманистон суднинг асосий ҳужжати — Халқаро жиноят судининг юрисдикциясини тан олишни англатувчи Рим статутини имзоламаган. Марказий Осиё давлатларидан уни фақат Тожикистон тан олади. Иштирокчи мамлакатлар суд қарорларини бажариш мажбуриятини олади, бироқ суднинг мажбуриятларни бажаришга мажбурлаш воситалари мавжуд эмас.
Москва Путинни ҳибсга олиш тўғрисидаги ордерни “юридик жиҳатдан аҳамиятсиз қарор” деб атади, 2016 йилда Россия ХЖС юрисдикциясидан чиққан. Кремль суд қарори президентнинг халқаро алоқаларига халақит бермаслигини билдирган.
Изоҳ (0)