Россияда мамлакат президенти Владимир Путинни ҳибсга олиш учун ордер берган Гаагадаги Халқаро жиноий суд прокурори қидирувга берилди. Бу ҳақда Медиазона хабар берди.
Россия Ички ишлар вазирлигининг қидирув маълумотлар базасида Карим Аҳмад Хоннинг маълумотлари келтирилган саҳифа пайдо бўлди. Прокурор Россия Жиноят кодексининг моддаси бўйича қидирувга берилган. Тергов қўмитаси Россия президентини ҳибсга олиш ордери берилганидан бир неча кун ўтиб Хон ва (ХЖС) судьялари Томоко Акане, Росарио Салваторе Айтали ва Серхио Херардо Угалде Годинесга қарши жиноий иш очган.
Улар “билиб туриб бегуноҳ шахсни жавобгарликка тортиш” ва халқаро муносабатларни мураккаблаштириш мақсадида халқаро ҳимоядан фойдаланаётган хорижий давлат вакилига ҳужум қилишга тайёргарлик кўришда айбланмоқда.
Россия Ички ишлар вазирлигининг қидирув базасидан судьялар ҳақидаги маълумотни топишнинг иложи бўлмаган.
Путинни ҳибсга олиш ордери
Нидерландиядаги Халқаро жиноят суди (ХЖС) геноцид, уруш жиноятлари, инсониятга қарши жиноятлар ва босқинчилик жиноятлари учун жавобгар шахсларни жавобгарликка тортиш билан шуғулланади. ХЖС 17 март Россия президенти Владимир Путинни ҳибсга олишга ордер берди.
Халқаро жиноят судининг ҳибсга олиш ҳақидаги ордери Путиннинг ҳаракатланиш эркинлигини расман чеклайди. ХЖСга аъзо бўлган ва унинг юрисдикциясини қабул қилган 123 та давлат Владимир Путин уларнинг ҳудудига кириши биланоқ уни ҳибсга олиши талаб қилинади. Бундай давлатлар қуйидаги хаританинг яшил рангида кўрсатилган:
Халқаро жиноий судда сиртдан суд жараёни амалга ошириш мумкин эмас: судланувчига фақат экстрадиция қилинган тақдирдагина ҳукм чиқарилиши мумкин. Яъни Путиннинг иши судда кўриб чиқилиши учун у шахсан Гаагада бўлиши керак.
Германия Путин мамлакатга келса, ҳибсга олишини билдирган
Германия адлия вазири Марко Бушман Россия президенти мамлакатга келса, маҳаллий ҳокимият уни ҳибсга олиб, Халқаро жиноий суд вакилларига топширишини билдирган.
“Халқаро жиноят суди (ХЖС) тезкорлик билан Интерпол билан боғланади ва ижрони талаб қилади. Шундан сўнг Германия Путинни ҳибсга олишга ва Германия ҳудудига кирса, уни ХЖСга топширишга мажбур бўлади”, — деган Бушманн.
Австрия Путинни ҳибсга олишга тайёрлигини маълум қилди
Австрия Халқаро жиноий суд қарорини бажаришини ва Россия президенти Владимир Путин мамлакатга келса, уни ҳибсга олишини билдирди. Мамлакатнинг Европа Иттифоқи ва Конституция масалалари бўйича вазири Каролина Эдцҳтадлер бу ҳақда маълумот берган.
У Халқаро жиноий суд томонидан ҳибсга олиш тўғрисидаги буйруқ эълон қилиниши ва чиқиши Путин “Австрия тупроғига қадам қўйган бўлса, уни ҳибсга олиш керак” деган маънони англатишини таъкидлаган.
Арманистон Путинни ҳибсга олишни режалаштирмаяпти
Арманистон Путин мамлакатга ташриф буюрса, уни Халқаро жиноий судга топширишни режалаштирмаяпти. Арманистон парламенти вице-спикери Акоп Аршакян бу бўйича маълумот берган.
“Арманистон Конституциявий суднинг қарори ҳеч кимни ҳеч қандай масалада айбдор деб ҳисобламайди ва ҳеч кимни ҳибсга олиш чораларини талаб қилмайди”, — деган у.
Изоҳ (0)