АҚШ ҳукумати Венесуэланинг “Трен де Арагуа” деб номланувчи жиноий гуруҳига мансуб 238 нафар муҳожирни Салвадорга депортация қилди. Улар у ердаги машҳур мега қамоқхонага жойлаштирилди. Бу ҳақда Салвадор президенти Найиб Букеле хабар берди.
Салвадордаги аэропортда муҳожирлар бўлган самолётни ўнлаб қуролланган хавфсизлик ходимлари кутиб олган. Мега қамоқхона ўзининг шароитлари билан халқаро миқёсда машҳур. Маҳбуслар қамоқда ўтирган ҳолда ишлашга мажбур. Улар ҳаддан ташқари гавжум камераларда яшайди, рақиб тўда аъзолари озиқ-овқат ва сув учун ўлимгача курашади, дейилади хабарда.
АҚШ улар учун жуда кам тўлов қилади, лекин биз учун бу юқори нарх. Вақт ўтиши билан 40 мингдан ортиқ маҳбусларнинг меҳнати қамоқхона тизимимизни ўзини ўзи таъминлайдиган қилади. Ҳозирда бу тизим йилига 200 миллион долларга тушмоқда, дейди Букеле.
Президентнинг таъкидлашича, Венесуэладаги тўда аъзоларидан ташқари, Эл-Салвадорда қидирувда бўлган МС-13 нинг 23 нафар аъзоси ҳам депортация қилинган.
Улардан бири жиноий ташкилотнинг олий тузилмаси аъзоси. Бу бизга разведка маълумотларини тўплашни якунлаш ва МС-13 нинг сўнгги қолдиқларини, жумладан, унинг собиқ ва янги аъзолари, маблағлари, қурол-яроғлари, гиёҳванд моддалари, яшириниш жойлари, ҳамкорлари ва ҳомийларини фош этишга ёрдам беради, деган Салвадор президенти.
Букеленинг айтишича, Салвадор “уюшган жиноятчиликка қарши курашда олдинга силжишга” содиқ. Аммо бу сафар иттифоқчиларга ҳам ёрдам беради.
Қамоқхона тизимимизни ўз-ўзини таъминлайдиган қиламиз ва мамлакатимизни янада хавфсизроқ жойга айлантириш учун муҳим разведка маълумотларини оламиз. Яратган Салвадорни, Қўшма Штатларни ёрлақасин, деган Букеле.
АҚШ давлат котиби Марко Рубио Салвадор президентига “ёрдам ва дўстлик” учун миннатдорлик билдирган.
Изоҳ (0)