Венгрия адлия вазири Бенце Тужон мамлакатнинг Халқаро жиноий суди аъзолигидан (ХЖС) чиқиш ниятини эълон қилди. У бу ҳақда ўтган ҳафта Ташқи ишлар ва савдо вазирлигида бўлиб ўтган элчилар учрашувида маълум қилган.

Ушбу баёнот Исроил бош вазири Биньямин Нетаньяхунинг Венгрияга ташрифи арафасида янгради.
Венгрия оммавий ахборот воситаларининг хабар беришича, агар Венгрия ХЖСдан чиқиш бўйича қатъий қарор қабул қилса, бу жараён узоқ давом этиб, тахминан, бир йилга чўзилиши мумкин. Ҳукумат парламентга аъзоликни тўхтатиш тўғрисидаги қарор лойиҳасини тақдим этишни режалаштирмоқда ва агар кўпчилик овози билан маъқулланса, аъзоликдан чиқиш тўғрисида расмий эълон қилинади.
Еврокомиссия матбуот котиби Анита Ҳиппер хабарларга изоҳ берар экан, идора мамлакатнинг бундай нияти ҳақида расмий хабар олмаганини таъкидлади.
“Агар бу маълумот тўғри бўлса, бундан чуқур афсусдамиз”, дея қўшимча қилди Анита Ҳиппер.
Венгриянинг ХЖСдан чиқиши тўғрисидаги сиёсий қарор аслида бир неча ҳафта олдин қабул қилинган бўлса-да, ҳукумат АҚШ президенти Дональд Трампнинг ХЖС бўйича позицияси қандай бўлишини кутаётган эди.
Трамп Биньямин Нетаньяхуни ҳибсга олиш ордери учун Гаага судига санкциялар киритишини эълон қилгач, Венгрия ҳукумати буни “яшил чироқ” сифатида қабул қилган.
Исроил бош вазири Биньямин Нетаньяху Халқаро жиноят суди томонидан Ғазо секторидаги инсониятга қарши жиноятлар ва ҳарбий жиноятлар учун ҳибсга олиш ордери берилганига қарамай, Венгрияга ташриф буюриши кутилмоқда.
Таъкидлаш жоизки, Венгрия Халқаро жиноят судининг Рим статутини имзолаган ва ратификация қилган. Яъни Будапешт расман статутни маъқуллаган, бироқ уни амалга ошириш учун ўз қонунчилигини ўзгартирмаган. Шу сабабли Будапешт Нетаньяхуни ҳибсга олиш бўйича берилган ордерни бажариш ниятида эмас.
Изоҳ (0)