Арманистон парламенти Гаагадаги Халқаро жиноий суднинг Рим статутини ратификация қилиш учун овоз берди, деб хабар бермоқда Meduza.
Armenpress хабарига кўра, ҳужжатни ратификация қилиш учун 60 депутат “ҳа”, 22 депутат “йўқ” овозини берди. Энди уни президент имзолаши керак.
Арман мухолифати овоз беришни бойкот қилди: хусусан, “Арманистон” блоки котиби Ацрвик Минасян ратификация лойиҳаси гўёки Арманистон конституциясига зид эканлигини айтди. Шу билан бирга, мамлакат Конституциявий суди бунинг мутлақо аксини таъкидлаган.
Арманистон 1998 йилда Рим статутини имзолаган, бироқ ҳужжат Арманистон конституциясига зид деб топилгач, ратификация жараёни 2004 йилда тўхтатилган. 2022 йил охирида Арманистон ҳукумати жараённи тиклади.
Россия Арманистонда Рим статути ратификация қилинишига фаол қарши чиқди — улар ХЖС Владимир Путин ва Мария Лвова-Беловани ҳибсга олишга ордер берган бир пайтда Ереваннинг бундай қарорини номақбул деб аталди.
Ўз навбатида, Арманистон ҳукумати низомни ратификация қилиш хавфсизлик масалалари туфайли зарур эканини асослаб берди:
“Мамлакатимизга қарши ҳарбий жиноятлар содир этилган ва этилмоқда. Бизга, мамлакатимизга, бу (ратификация) керак”, — деган парламент спикери Алён Симонян сентябр бошида.
Рим статути Халқаро жиноий судни ташкил этувчи шартномадир. Уни 137 давлат имзолаган, 120 дан ортиқ давлат ратификация қилган.
ХЖС Путин ва Лвова-Беловани ҳибсга олиш ордерини 2023 йил март ойида берган. Улар украиналик болаларни босиб олинган ҳудудлардан ноқонуний олиб чиқиб кетишда гумонланмоқда.
Изоҳ (0)