“Умуртқамда тўртта чурра бор ва бутун танам кўкариб кетган”: “Мўжизакор аёл” фильми юлдузи Гал Гадот суратга олиш жараёнида олган жароҳатлари ҳақида

“Исроил гўзали 2004” унвони ғолиби суратга олиш жараёнларидаги мураккаб трюкларни ўзи бажаришни яхши кўради. Гал Гадот суратга олиш жараёнида кўплаб жароҳатлар олган.

38 ёшли исроиллик актриса Голливуд фильмларида суратга тушиб, муваффақиятли карьера қура олди. У ўз қад-қоматидаги ўзгаришларни диққат билан кузатиб боради ва мураккаб жанг саҳналарида ишончли кўриниш учун спорт билан жиддий шуғулланади. Гал сўнгги “Тошюрак” фильмининг суратга олиш жараёнларида олган жароҳатлари ҳақида гапириб берди.

“Исроил гўзали 2004” танлови ғолиби учун жосуслар ҳақидаги триллерда рол ижро этиш осон кечмади. Гадот барча каскадёрлик саҳналарини ўзи бажаришга ҳаракат қилди. Актриса ўзини тўлиқ назорат қилишни яхши кўради. Шу нуқтаи назардан, жанг саҳналари ҳам унга ёқимли кўринади.

“Фильм яратишда менга ёқмайдиган нарсалар бор. Бироқ мен жанг қилишни ва қўл жанги билан шуғулланишни жуда яхши кўраман”, — дейди актриса.

Суратга олиш кунларидан сўнг, актрисанинг бутун танаси кўкариб кетган. Шу сабабдан актриса одатдагидек болалари билан сайр қилишга чиққанда ўтиб кетаётган инсонлар унга ғалати қараб кетаётганини кўриб қолган.

“Қайсидир якшанба куни мен уч қизим билан Лондондаги паркда сайр қилишга чиққан эдим. Оёғим ва орқам бутунлай кўкариб кетган экан, бу ҳақда умуман ўйламасдан ёзги кўйлак кийиб олгандим. Ўша пайтда инсонлар менга ғалати қараб ўтиб кетганини пайқадим”, — дейди “Мўжизакор” фильми юлдузи.

Бундан ташқари, Гадотнинг умуртқа поғонаси билан боғлиқ муаммолар бор эди. “Ушбу жисмоний роллар туфайли менда бир қатор жароҳатлар борлиги муқаррар. Менда иккита бўйин чурраси ва иккита орқа умуртқа чурраси бор. Афсуски, бу ишнинг бир қисми”, — дейди кўп фарзандли актриса The Sun нашрига берган интервьюсида.

Гал 48 ёшли исроиллик тадбиркор Ярон Версано билан турмуш қурган. Улар ҳозирда иттифоқида уч нафар: 12 ёшли Алма, олти ёшли Майа ва икки ёшда бўлган Даниэла исмли фарзандларини тарбияламоқда.

Гал “Исроил гўзали” унвонига эга бўлгандан сўнг, икки йиллик ҳарбий хизматни ўтади. Кейинчалик у юридик соҳа бўйича таҳсил олди ва бу вақтда модел сифатида ишлади. 2009 йилда актриса “Форсаж” фильмида жангчи қиз Жизел Яшар ролини ўйнади.