Блогер ва хонанда Азода 23 апрель куни 25 ёшни қаршилади. Ҳаётда кўплаб қийинчиликларга учраган ва ўзга Республика фуқароси бўлса-да, ўзбекистонлик мухлисларнинг қалбидан жой олган ижодкор ҳақида нималарни биласиз?
Нега Азода, Озода эмас?
— Қозоғистонда “о” ҳарфи бошқача талаффуз қилинади. Мени Ўзода деб чақиришлари ёқмагани учун исмимни Азодага ўзгартиришга қарор қилганман. Тошкентга келиб, санъат йўлини танлаганимдан кейин ҳам худди шу исмни сақлаб қолишни истадим. Чунки ўзбек санъатида Озода исмли машҳур хонанда бор. Миллатим тожик, 2020 йилгача Қозоғистонда яшаганмиз. Аммо болаликдан ўзбек тили ва урф-одатларига қизиқиш кучли бўлган. Шу боис Ўзбекистонда ижод қилишни таклиф қилишганда, жон деб рози бўлганман.
“Дадам бизни ташлаб кетган”
— Болалигимда дадам билан онам оилавий келишмовчилик сабаб ажрашиб кетишган. Учта болани ёлғиз тарбиялаш ва боқиш онамга осон кечмаган. Дадам бизни ташлаб, янги оила қуриб, ўзи билан ўзи овора бўлиб кетган. 2012 йил оиламиз учун ниҳоятда оғир келган. Онамни гап-сўзлар, тазйиқлар эзиб қўйган. Ўшанда онамни ҳеч ким эшитмаган.Онамнинг қийналаётганини кўриб, 12 ёшимдан унга ёрдамлашишга ҳаракат қилганман. Бош фарзанд барибир ота-онага кўмакдош бўларкан. Биз шаҳардан чеккароқ жойда яшардик. Шу боис онам билан тонг саҳарда туриб, марказга ишлаш учун келардик. Фастфуд егуликлари ва нон сотадиган ерда ишлаганмиз. Тушгача ишлаб, кейин мактабга кетардим.
“Уйимиз боълмаган”
— Болалигимдаги энг катта қийинчилик уйсизлик билан боғлиқ. Ҳақиқатан ҳам у ерда уйимиз йўқ эди. Ижара уйда яшаш осон эмас. Аммо у кунларни қийинчилик дегим келмайди, чунки уйимиз бўлмагани билан жуда бахтли эдик. Онам камтарона бўлса-да, бахтли оила муҳитини яратиб берган.
Дадам ҳақида кўп сўрашади. Лекин шахсий ҳаётим ҳақида гапиргим келмайди. 12 ёшимда дадамдан қаттиқ ранжигандим. Онамнинг ёнини олаверганим учун жаҳл устида менга сендек қизим йўқ, деган гапни айтган. Бу гап кўнглимга жуда оғир ботган.
Уни санъат коллежига қабул қилишмаган
— Мактабни тамомлаган йилим ҳам Тошкентга келганман. Эстрада цирк коллежининг актёрлик бўлимига ҳужжат топширмоқчи бўлганман. Аммо ҳужжатларимни қабул қилишмаган. Ростини айтсам, яқинларим ҳам санъаткор бўлишимга қарши бўлган. Қизлар учун энг яхши мутахассислик ўқитувчилик дейишган. Шундан кейин Қозоғистондаги коллежда бошланғич синф ўқитувчилиги мутахассислиги бўйича ўқиганман. Бироқ институтда ўқишга имконим бўлмаган. Лекин бир муддат мактабда ўқитувчилик қилганман.
“Шаҳло Зоирова сабаб омадим келган”
— Кўпчилик мени тиктокер деб билади. Аммо 2017 йил блогерликни бошлаганимда ҳали TikTok яратилмаганди. Мен асосан қозоқ ёшлари билан “КВН”ларда иштирок этардим. Ижтимоий тармоқлар учун ҳам вайнлар олардим. Қозоқ тилида бўлгани учун ўзбек кузатувчилари уларни кўрмаган бўлишлари табиий ҳол. 2019 йил комик актриса Шаҳло Зоировани пародия қилиб, видеони Instagram’га жойлаганман. Ана шу видео сабаб омадим келган. Instagram’да ўзбек кузатувчиларим сони ортганидан кейин Ўзбекистонга таклиф этишган. Узоқ оилавий баҳсдан сўнг 2020 йилнинг 16 декабрь куни Ўзбекистонга келганман. Оиласидан узоқда яшаш жуда қийин. Ўшанда уйдагиларни ҳам бу ерга олиб келаман, укам билан синглимни ўқитаман, деб ният қилгандим. Ниятимга етдим.
Фирибгарлар уйнинг пулини “ухлатишган”
— Онам уй сотиб олишимиз учун Жанубий Кореяга ишлагани кетганди. Аввал ҳам ишлаган пулларимизни тўплаб уй олмоқчи бўлганмиз. Аммо фирибгар онамни чув тушириб кетган. Катта пулдан айрилганимиз оиламиз учун стресс бўлган. Хуллас, 2021 йил омадли келди. Ишлаган пулларимни тўплаб онам учун уй сотиб олдим. Онамга қўнғироқ қилиб, айтганимда қувониб кетганди.
Блогер, актриса ва энди хонанда
— Илгари Ўзбекистон давлат консерваториясида ўқишни истардим. Ҳозир бунга хоҳишим йўқ. Ўқимоқчиман, лекин бошқа мутахассисликни эгаллаш ниятидаман. Менимча, яхши актёрга шогирд тушиб, актёрлик сирларини ўрганса бўлади. Амалиёт эса ижодкорни пишитади. Қўшиқ айтишга болалигимдан қизиқаман. Бироқ бу бўйича ҳам малакамни оширишим керак. Ҳозирча қўшиқларим кўп эмас. Шунга қарамай халқ талаби билан хизматларда иштирок этяпман.
Биринчи катта рекламаси ҳақида
— Қозоғистонда чой рекламасига чақиришган. Ўшанда 15 минг доллар олганман. Самолётда бизнес классда съёмкага бориб келганмиз. У ердаги шароит унча-мунча жойда йўқ. Улар мени “Соғинасан” клипимдан кўриб чақирган. Россиялик қўшиқчи Егор Криднинг клипини олган режиссёр рекламада мен чиқишимни хоҳлаган экан.
Турмуш ўртоғи билан қандай танишган?
— Турмуш ўртоғимнинг акалари, фудблогер Жамшид Бобожоновнинг уйларига контент олиш учун борганмиз. Ўшанда Жамшид акага нимадир керак бўлиб қолиб, буларни чақирганлар. Илк марта ўшанда кўришганмиз. Кейинчалик кўчада, уёқ-буёқда кўришиб қолиб, яқинлашиб кетдик.
Тўйга қанча пул сарфланди?
— Турмуш ўртоғим бошиданоқ тўйнинг ташкилий ишларини ўзлари қилишларини айтганлар. Мен умуман аралашмадим. Улар санъат соҳасига бегона эмаслар. Кўпчилик санъаткорлар уларнинг ҳурмати учун хизмат қилиб кетди. Тўйимиз пойтахтдаги энг олди тўйхоналардан бирида бўлди. Шунинг учун турмуш ўртоғим тўйга 35 минг доллар харажат қилдилар. Бу сумма Дубайдаги Marry me маросимидан ташқари.
Қайнотам ва қайнонам бошида сарпо керакмаслиги ҳақида айтган. Шунинг учун бу уйга фақат кийимларим, тақинчоқларим ва стол-стул билан келдим. Чунки уйни безатамиз деганимизда ҳам қайнонам рози бўлмадилар. Уйларида ҳамма нарса янги бўлса ҳам блогер келин келяпти деб, ҳамма нарсани янгитдан қилиб беришди.
Нега камнамо бўлиб қолди?
— Аввалига бу ҳақида айтмай, яшираётгандим. Аммо бундан фойда йўқ. Тўйдан кейин яхшигина вазн олдим. Камера қаршисида ўзимни кўриб, стрессга тушдим. Буни ортиқча вазни бор аёллар жуда яхши билишади. Бу ўзимга бўлган ишончимни анча пасайтирди. Лекин бўш келиш ниятим йўқ, мен албатта кўзлаган мақсадимга эришаман, дейди Азода.
Изоҳ (0)