Британиялик машҳур қўшиқчи, бастакор ва афсонавий Queen гуруҳининг етакчи вокалисти сифатида ижод қилган Фредди Меркюрининг синглиси Кашмира Булсара акасининг буюмлари оилада қолиши учун ҳеч нарсани аямади. У марҳумга тегишли барча предметларни Меркюрининг собиқ турмуш ўртоғи Мери Остин ташкил қилган аукционда сотиб олди.
Кашмира сотиб олган буюмлар орасида Фреддининг олти мушугини акс эттирувчи суратлар билан безатилган жилет, мусиқий автомат, саккиз саҳифалик қўшиқ қўлёзмалари, ҳарбий куртка, лампа, Nike спорт кийими ва муз учун мўлжалланган куб шаклидаги челак бор эди. У буларнинг барчасига 4 миллион доллар тўлади.
Мери Остин — рок афсонасининг юрагини забт этган аёл бўлиб, 1991 йилда Меркюри вафот этганидан бери унинг мол-мулкининг асосий меросхўри ҳисобланади. 74 ёшли Мери хонандага тегишли эсдалик буюмларини сотувга қўйганини эшитган 73 ёшли Кашмира бундан қаттиқ ғазабланганини яшира олмаган.
Фото: Biography
The Sun нашрига берган интервьюсида инсайдерлар шундай дейди:
“Кашмира келинининг ишларидан жуда аччиқланган ва хафа бўлган, чунки акасининг кўплаб шахсий буюмларини исталган одамга сотиб олиш учун тақдим этиш яхши эмас. У Фреддининг бутун дунё бўйлаб севиб ҳурмат қилинишини қадрлайди, лекин марҳумдан қолган ёдгорликлар унинг яқинларига эмас, бегоналарга тегишли бўлиб қолаётгани сингилни хафа қилади”.
Фото: Getty Images
Ўзаро битим махфийликда амалга оширилди. Меркюри оиласи ва Мери Остин ўртасидаги зиддият узоқ йиллардан бери давом этмоқда. Шунинг учун Кашмира акасининг буюмларини харид қилиш учун учинчи шахслар ёрдамидан фойдаланди. Харид бўйича улар бошқа ҳеч қандай изоҳ бермади.
Аввалроқ ҳам Мери Остин Меркюрининг буюмларини сотган ва тушган маблағнинг бир қисмини Фредди шарафига гуруҳ аъзолари ва менежери Жим Бич томонидан ташкил этилган Mercury Phoenix Trust хайрия жамғармасига ҳамда Элтон Жоннинг ОИТСга қарши жамғармасига тақдим этган.
Изоҳ (0)