Гўзаллик нормаларига мос бўлиш ва ёшликни сақлаб қолиш учун машҳурлар кўп нарсага тайёр. Аммо баъзида мукаммалликка интилиш йўлидаги турли жарроҳлик операциялари ачинарли оқибатларга олиб келади. Қуйида кутилган натижани олмаган ва косметик муолажадан сўнг табиий гўзаллигини йўқотган машҳурлар ҳикояси билан танишамиз.
Рене Зеллвегер
“Бриджит Жонснинг кундалиги” фильми орқали машҳур бўлган Рене Зеллвегер фильм қаҳрамонидан фарқли равишда ҳар доим гўзал қоматга эга бўлган. Бироқ 2014 йилда актрисанинг янги кўриниши мухлисларни ҳайратда қолдирди. Актриса қизил гиламда тамоман бошқа чеҳра билан пайдо бўлди: унинг ўзига хос кўзлари ўзгариб кетган эди.
Зеллвегернинг бу қадар кескин ўзгариши танқидларга сабаб бўлди. Мутахассислар актриса қовоқларини торттирган бўлиши мумкинлигини тахмин қилишди. Орадан беш йил ўтгач, у жарроҳлик аралашуви оқибатларини тузатишга эришди — актрисанинг аввалги кўз шакли ва мимикаси қайтди.
Микки Рурк
Бир вақтлар Голливуднинг энг хушбичим актёрларидан бўлган Микки Рурк кино фаолиятидан аввал бокс билан шуғулланган. Рингда мия чайқалиши травмасини олгандан сўнг шифокорлар унга бир йил спорт билан шуғулланмасликни тавсия беришди. Шу орада у актёрликка қадам қўйди. 1991 йилда Рурк яна рингга қайтди ва натижада кўплаб юз жароҳатларини олди.
Актёр пластик жарроҳларга мурожаат қилди, аммо операциялар ташқи кўринишдаги муаммоларни ҳал эта олмади. Унинг янги кўриниши кинодаги фаолиятига салбий таъсир кўрсатди. Фақатгина “Курашчи” фильми туфайли у томошабинлар эътиборини жалб қила олган.
Лара Флинн Бойл
Девид Линчнинг афсонавий “Tvin Piks” сериали юлдузига порлоқ келажак башорат қилинганди. У ўзининг нафис гўзаллиги билан кинода шуҳрат қозонган эди.
Лара Флинн Бойлнинг ташқи кўринишидаги дастлабки ўзгаришлар 2000 йиллар бошида кўзга ташланди. Ёшликни сақлаб қолиш истагида у пластик жарроҳлик ва инексияларга мурожаат қила бошлади. Кўп ўтмай, Бойлнинг юзи шишиб қолган кўринишга келди, лаблари эса ғайритабиий равишда катталашди. Мутахассисларнинг фикрича, жарроҳлик амалиёти юзнинг табиий пропорция сини бузган ва актрисанинг кўринишига салбий таъсир кўрсатган.
Мадонна
Мадоннанинг замонавий суратлари билан 10-15 йил олдинги клипларини солиштирсангиз, улар икки хил одам деб ўйлашингиз мумкин. Вақт қўшиқчининг ташқи кўринишига ўз таъсирини ўтказа бошлагач, у пластик жарроҳлар ва косметологлар ёрдамига мурожаат қилишга қарор қилди.
2000 йиллар бошида Мадонна турли ёшартириш усуллари: юзни торттириш, липотрансфер (юз ва тананинг турли қисмларига ўз ёғ ҳужайраларини кўчириш), блефаропластика (қовоқларни олдириш), липосакция (кўкрак пластикаси) ва бошқа муолажаларни бажарган.
2010 йилларнинг бошида филлерлар қўйиш модаси бошланди, бу муолажадан сўнг юзда маълум муддат шишлар бўлади. Мадоннада ҳам айнан шундай ўзгаришлар кузатилди. Хонанданинг ёши 60 га яқинлашгани сари у жарроҳларга тобора кўпроқ мурожаат қилмоқда.
Меган Фокс
Бир пайтлар Голливуднинг энг қувноқ актрисаларидан бири бўлган Меган Фокснинг шахсан ўзи ҳам бир неча бор кўкрак операциясини ўтказганини тан олган. Биринчи марта у 21 ёшида операция столига ётган. Юзига келсак, актриса юз жарроҳлиги бўйича барча миш-мишларни рад этган, аммо ботокс инексияларини яширмайди. Ҳозирда лабларини катталаштирган актрисани мухлислар ҳиссиз қўғирчоққа ўхшатмоқда.
Зак Эфрон
“High School Musical” мюзикл сериали юлдузи Голливуддаги энг келишган актёрлардан бири бўлган, бироқ бир неча йил олдин Зак Эфрон мухлисларни ҳайратда қолдирди. Унинг юзи бир оз шишган, жағлари катталашган ва ёноқлари ҳам ажралиб қолган эди. Эфрон бу ўзгаришларни жароҳат билан изоҳлади. Унинг сўзларига кўра, актёр сирғаниб кетиб, ияги билан гранит фавворага урилган ва жағи синиб кетган. Шифокорлар жағини қайта йиғишган, бу эса мимика ва юз шаклига таъсир қилган. Эфроннинг мухлислари эса уни инексияларга мурожаат қилган деб ҳисоблайди.
Линда Евангелиста
Фаолиятининг чўққиси — 1998 йилда Линда Евангелиста уч йиллик танаффус олди, аммо тез орада экранларга қайтди. Бироқ 2016 йилда кутилмаганда яна ғойиб бўлди. Мухлислар уни карьерасидан танаффус олган, деб ўйлади, аммо 2021 йилда Евангелиста ҳақиқатни очиқлади: у криолиполиз қурбони бўлди. Шифокорлар унга ортиқча ёғ ҳужайраларидан халос бўлишни ваъда қилган, аммо муолажадан сўнг ёғ тўқималари аксинча кўпайиб кетди. Унга ҳеч қандай парҳез ва спорт ҳам ёрдам бермади.
Сўнг шифокорлар Линдага “парадоксал ёғ гипертрофияси” ташхисини қўйишди. Умидсизликка тушган Евангелиста липосакцияга мурожаат қилди, аммо бу ҳам керакли натижа бермади. 2022 йилда косметологик хизмат кўрсатган компанияга қарши 50 миллион долларлик даъво аризаси билан чиқди. Аммо аввалги кўринишини қайтара олмади.
Изоҳ (0)