AQSH prezidenti Donald Tramp agar Pekin Amerika bojlariga qarshi javob choralaridan voz kechmasa, 9-apreldan boshlab Xitoydan keltirilayotgan tovarlarga 50 foiz miqdorida qo‘shimcha bojlar joriy etish bilan tahdid qildi. Bu haqda Amerika yetakchisi Truth Social ijtimoiy tarmog‘ida yozgan.
“Kecha Xitoy allaqachon o‘rnatilgan rekord darajadagi bojlar, nomonetar tariflar, kompaniyalarni noqonuniy subsidiyalash va valyuta bilan keng ko‘lamli uzoq muddatli manipulyatsiyalarga qo‘shimcha tarzda 34 foizlik javob tariflarini joriy etdi. Bu mamlakatimizga nisbatan uzoq muddatli tarif buzilishlaridan tashqari qo‘shimcha tariflar kiritish orqali AQSHga qarshi javob choralarini ko‘rgan har qanday davlat darhol yangi va sezilarli darajada yuqori tariflarga duch kelishi haqidagi ogohlantirishimga qaramay amalga oshirildi”, deya yozdi u.
Trampning ta’kidlashicha, agar Xitoy ertangi kunga qadar o‘zining uzoq vaqtdan beri mavjud bo‘lgan “savdo suiiste’molliklari” ustiga 34 foizlik oshirishini bekor qilmasa, 2025-yil 8-aprelda Qo‘shma Shtatlar Xitoyga 9-apreldan kuchga kiradigan 50 foizlik qo‘shimcha bojlarni joriy etadi.
“Bundan tashqari, Xitoy bilan ular so‘ragan uchrashuvlar bo‘yicha barcha muzokaralar to‘xtatiladi. Uchrashuv o‘tkazishni so‘ragan boshqa davlatlar bilan muzokaralar darhol boshlanadi. Ushbu masalaga e’tibor qaratganingiz uchun tashakkur”, deya xulosa qildi Amerika yetakchisi.
Eslatib o‘tamiz, AQSH prezidenti Donald Tramp 2-aprel kuni 185 ta mamlakat va hududdan keltirilayotgan mahsulotlarga bojxona to‘lovlari joriy etilishini e’lon qilgandi. Xitoyga nisbatan AQSH bojlari 34 foiz darajasida belgilandi. Bunga javoban Xitoy hukumati 10-apreldan boshlab AQSHdan import qilinadigan barcha mahsulotlarga 34 foiz miqdorida qo‘shimcha bojlar joriy etilishini ma’lum qildi. Shundan so‘ng AQSH prezidenti o‘zining ijtimoiy tarmog‘ida Xitoyning AQSHga qarshi javob tariqasida boj to‘lovlari kiritishi xato qadamligini bildirib, tanqid qilgandi.
Izoh (0)