АҚШ Хитойдан олиб кириладиган смартфон, ноутбук ва бошқа электроника маҳсулотларига жорий этилган кескин бож тўловларини бекор қилди. Бироқ расмийлар бу узоқ давом этмаслигини айтди. АҚШ президенти Дональд Трамп эса ҳеч ким “жазодан қутулмайди” дея огоҳлантирди. Бу ҳақда The Guardian хабар берди.
Бу маҳсулотларга ҳеч қандай бож имтиёзи берилмаган. Улар амалдаги 20 фоизлик фентанил божлари остида қолмоқда, фақат бошқа таъриф тоифасига ўтказилмоқда, деди Трамп ўзининг Truth Social платформасида.
У бутун электроника таъминот занжирига оид миллий хавфсизлик бўйича савдо тергови бошланишини ваъда қилди.
Бошқа давлатлар, айниқса, Хитой каби душманона савдо юритадиган мамлакатлар бизни гаровга ололмайди, деди у.
Оқ уй 11 апрель куни айрим электрон маҳсулотлар учун Хитой кескин божлардан озод қилинишини эълон қилди. Ушбу қарор АҚШ фонд бозорларида тикланиш кутилаётган пайтга тўғри келди. Apple ва чип ишлаб чиқарувчи Nvidia компанияларининг акциялари кўтарилиши мумкин эди. Чунки уларнинг маҳсулотларига қўйилган божлар 90 кунга олиб ташланган.
Хитойнинг Савдо вазирлиги бу имтиёзларни АҚШнинг “ўзининг нотўғри, бир томонлама бож сиёсатини тузатишга қаратилган кичик қадами” сифатида баҳолади. Вашингтондан барча божларни бутунлай бекор қилишни талаб қилди.
АҚШ президентининг савдо котиби Ховард Лутникнинг айтишича, Трамп бир-икки ой ичида смартфонлар, компьютерлар ва бошқа электрон маҳсулотларга нисбатан “махсус йўналтирилган бож” жорий қилади. Бу яримўтказгичлар ва фармацевтик маҳсулотларга қаратилган секторли божлар билан бирга жорий этилади.
Бу маҳсулотлар ўзаро божлар рўйхатидан чиқарилган бўлиши мумкин, лекин улар энди яримўтказгичлар таърифлари доирасига киради. Улар Америка ҳудудида ишлаб чиқарилиши керак бўлган стратегик маҳсулотлар ҳисобланади, деди Лутник.
Дунёнинг энг йирик икки иқтисодиёти Трамп томонидан Хитой импортларига нисбатан эълон қилинган глобал бож сиёсатидан сўнг кескин савдо урушига юз тутди. 14 апрель куни Хитой раҳбари Си Цзиньпин бож урушида ҳеч ким ғолиб бўлмаслигини айтди.
АҚШ ва Хитойнинг савдо уруши
Ўзаро жавоб чораларидан сўнг, АҚШнинг Хитойга қарши бож ставкаси 145 фоизга чиқди. Хитой эса АҚШ маҳсулотларига 125 фоизлик жавоб божи жорий қилди. 11 апрель куни Пекин янги тарифларни эътиборсиз қолдиришини билдирди.
Хитой Трамп божлари ҳаддан ташқари юқори бўлгани сабабли, улар кўтарилса ҳам “АҚШ маҳсулотлари Хитой бозорида ўз ўрнини топа олмайди”, дея таъкидлади.
14 апрель куни Хитой божхона хизмати вакили мамлакат экспорти мураккаб ва кескин ташқи шароитга дуч келаётганини тан олди. Аммо у “осмон қуламайди”, дея жавоб қайтарди.
Трамп савдо бўйича ўнлаб ҳамкорларга бож эълон қилгач, уларнинг кўпчилиги учун 90 кунлик танаффус эълон қилди. Хитой бу имтиёздан мустасно бўлди.
Изоҳ (0)