АҚШ президенти Дональд Трамп Хитойга қарши эълон қилган савдо урушида мағлубиятга учраши мумкин. Иқтисодий таҳлилчи бунинг учта сабабини кетириб ўтди. Бу ҳақда Financial Times хабар берди.
Хитой иқтисодиётини ўрганувчи Dragonomics компаниясининг тадқиқотлар бўйича директори Артур Кребер тегишли сабабларни санади. Биринчи сабабга кўра, ҳозирда кўплаб жаҳон етакчилари Трамп маслаҳатчиларининг божлар бўйича иқтисодий далиллари шунчаки “кўзбўямачилик” эканини англамоқда.
Трамп ҳокимиятда экан, бирорта давлат ҳам АҚШнинг Хитойга қарши “салиб юриши”га қўшилмайди, дейди Артур Кребер.
Иккинчи сабаб АҚШ ташқи сиёсатининг давлат қарзи бозорига боғлиқлигидир. Трамп аллақачон савдо музокараларида таъсир ўтказиш воситаларини йўқотиб, бозорнинг салбий реакциясидан сўнг юқори божлардан воз кечишга мажбур бўлди. Натижада, у савдо музокараларида босим ўтказиш имкониятини йўқотди ва энди тарифларни яна кўтаролмайди.
Учинчи ва муҳим сабаб Хитойнинг АҚШга қарши “иқтисодий ҳолдан тойдириш” урушига пухта тайёргарлик кўрганидир. Кребернинг фикрича, Хитой АҚШ бозоридаги талабни ички истеъмол талаби билан осонликча қоплай олади. Бундан ташқари Америка импортисиз ҳам бемалол фаолият юрита олади.
Трампнинг савдо уруши
2 апрель куни АҚШ президенти Дональд Трамп барча давлатлар учун 10 фоизлик асосий тарифларни жорий қилди. Аммо божлар ҳар бир давлатнинг савдо балансига қараб ўзгарди. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 34 фоизга етказди.
Бунга жавобан Пекин ҳам шунча миқдорда Америка товарларига божлар солди. Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилди. Шу сабабли божлар 104 фоизга ошди.
Натижада Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп Пекин учун тарифлар 125 фоизга чиқишини айтди, кейинчалик буни 145 фоизга оширди. Хитой мазкур тарифларга жавобан ставкани 125 фоизга кўтарди.
Хитой АҚШни “ўзаро божлар”ни бекор қилишга ва ўзининг нотўғри амалиётини тузатишга чақирди. ХХР раиси Си Цзиньпин ҳеч бир давлат “бож уруши”дан ютмаслигини қайд этди.
Изоҳ (0)