АЭС энергия мустақиллигини таъминлашда янги имконият

Бугунги кунда АЭСлар қурган ва улардан ҳали-ҳануз фойдаланиб келаётган давлатлар тўғрисида қизиқиб кўрганмисиз?

Қуйида шу масалага бир оз эътибор қаратамиз. Маълумотларга кўра, дунёда биринчи бўлиб Россияда 1954 йилда қуввати 6 МВт бўлган АЭС ишга туширилган. Орадан 70 йилдан ортиқ вақт ўтиб, АЭС имкониятларидан фойдаланадиган мамлакатлар сони анчага кўпайди. 

Бугунга келиб дунёнинг 32 та мамлакатида умумий қуввати жами 377 ГВт бўлган 417 та атом реакторлари фаолиятини давом эттирмоқда. Шунингдек, 61 та атом реакторлари қурилиш жараёнида.
АЭС қурган ва улардан тўлиқ фойдаланаётган мамлакатлар рўйхатига Япония, Жанубий Африка, Жанубий Корея, Швесия, Швейцария, Франция, Туркия, АҚШ, Россия, Покистон, Эрон, Хитой, Ҳиндистон, Германия, Англия, Беларусия ва бошқа давлатлар киради. Айнан шу давлатлар қурилган АЭС ҳисобига ўзларининг энергия мустақиллигини таъминлаган ҳамда иқтисодий ўсишда сезиларли натижаларга эришган. 
Сўнгги йилларда Ўзбекистон ҳам кўплаб ривожланган мамлакатлар қатори замонавий АЭС қуриш борасида бир қанча лойиҳаларни бошлаган эди. Куни кеча давлатимиз раҳбарига мазкур масалага дахлдор бўлган масъуллар томонидан республикамизда атом энергетикасини ривожлантиришга қаратилган вазифалар ижроси юзасидан ахборот берилди. 

Мазкур йиғилишда 2035 йилга келиб юртимизда электр истеъмоли 121 млрд киловатт соатга етиши ҳисоб-китоб қилингани таъкидлаб ўтилди. Шу боис энергетикани барча йўналишларда ривожлантириш чоралари кўриб чиқилмоқда. 

Хусусан, 2030 йилга бориб, мамлакатимизда жами генерацияда “яшил” энергия улушини 50 фоизга етказиш режалаштирилган. Бунинг ичида узоқ муддатда атом энегрияси базавий манбалардан бирига айланиши кўзда тутилаётгани ҳам таъкидлаб ўтилди.

Сир эмас, АЭСда ишлаб чиқарилган  электр энергияси нархи анъанавий энергия ресурсларига (газ, кўмир, мазут) нисбатан барқарор, арзон, экологик тоза электр манбаи ҳисобланади.

Шу билан бирга АЭСларнинг углеводородли ёқилғи қўлланиладиган анъанавий электр станцияларига нисбатан яна бир афзаллиги кам ҳажмдаги ёқилғи сарф қилган ҳолда улкан миқдорда энергия ишлаб чиқариш хусусиятига эга эканлиги.

Атом электр станцияларини қуриш истиқболли лойиҳа бўлиб, келажак авлод учун энергия хавфсизлигини таъминлашда муҳим замин яратади.