Хитой АҚШдан импорт қилинадиган кўмир, суюлтирилган газ, нефть, қишлоқ хўжалиги техникаси ва баъзи автомобилларга бож жорий қилади. Бу ҳақда Хитой Молия вазирлиги хабар берди.
Кўмир ва суюлтирилган газга 15 фоиз, нефть, қишлоқ хўжалиги машиналари ҳамда автомобилларга 10 фоиз бож солинади. Таркибида волфрам бўлган маҳсулотларга экспорт назорати чоралари жорий этилмоқда.
Бундан ташқари, Хитой ҳукумати Calvin Klein, Tommy Hilfiger ва Van Heusen брендларига эгалик қилувчи PVH Corp ва генетик тестлаш соҳасидаги маҳсулот ҳамда хизматлар етказиб берувчи Illumina Inc.ни “ишончсиз” ташкилотлар рўйхатига киритди.
Бу чоралар АҚШ томонидан Хитой товарларига импорт божларининг оширилишига жавобан кўрилди. Бу ҳақда президент Дональд Трамп олдинроқ маълум қилганди.
“АҚШнинг бир томонлама божларни жорий этиши Жаҳон савдо ташкилоти қоидаларини жиддий равишда бузмоқда. Бу уларга ўз муаммоларини ҳал қилишга ёрдам бермасдан қолмай, Хитой ва АҚШ ўртасидаги нормал иқтисодий ҳамда савдо ҳамкорлигига ҳам путур етказади”, дея таъкидлади Хитой Молия вазирлиги.
Хитойнинг Валютани назорат қилиш давлат бошқармаси (State Administration of Foreign Exchange, SАFЕ) сешанба куни Америка компанияси Google’га (Alphabet Inc.га қарашли) нисбатан монополияга қарши қонунчиликни бузиш бўйича текширув бошлади.
Google’нинг қидирув ва бошқа бир қатор хизматлари 2010 йилдан бери Хитойдаги фойдаланувчилар учун ёпиқ, бироқ компания мамлакатда айрим фаолиятларини, асосан, онлайн реклама соҳасида давом эттирмоқда.
3 февраль куни Трамп журналистларга кейинги 24 соат ичида Пекин билан музокаралар бўлиши эҳтимоли борлигини айтган. Оқ уй матбуот котиби Керолайн Левиттнинг Fox News’га маълум қилишича, гап Трамп ва Хитой раиси Си Цзиньпин ўртасидаги суҳбат ҳақида бормоқда.
Трамп 3 та давлатга божлар жорий қилди
АҚШ Канада, Хитой ва Мексикадан келтирилаётган товарларга божхона тўловларини жорий этади. Президент Дональд Трамп тегишли фармонни 1 февраль куни имзолади. У мазкур қарорини ноқонуний мигрантлар ва гиёҳванд моддалар контрабандаси таҳдиди билан изоҳлади. Бунга жавобан Хитой АҚШни савдо уруши бошланишидан огоҳлантирди.
Хитой Ташқи ишлар вазирлиги баёнотида “савдо ёки божхона урушида” ғолиблар бўлмаслиги таъкидланган.
“Қўшимча 10 фоиз миқдоридаги божлар мамлакатлар ўртасидаги наркотрафикка қарши курашда икки томонлама ҳамкорликка таъсир қилиши ва унга зарар етказиши муқаррар”, дейилади вазирлик хабарида.
Хитой “янги божларни қатъиян рад этиши” ва “ўз ҳуқуқ ва манфаатларини қатъий ҳимоя қилиши учун “тегишли жавоб чораларини кўриши”ни таъкидлади. Эндиликда Хитой Жаҳон савдо ташкилотига (ЖСТ) АҚШга қарши шикоят қилиш ниятида.
Канада қандай чора кўрди?
Канада Трамп томонидан унинг товарларига жорий этилган 25 фоизлик божга жавобан худди шундай чоралар кўради. Бу ҳақда Канада бош вазири Жастин Трюдо маълум қилди.
АҚШдан келтирилаётган 155 миллиард Канада доллари (106,5 миллиард АҚШ доллари) қийматидаги маҳсулотларга 25 фоизли бож солинади. 4 февралдан 30 миллиард Канада доллари миқдоридаги маҳсулотларга нисбатан, ундан уч ҳафта ўтгач эса қолган суммага нисбатан чоралар кучга киради. Америка божлари ҳам 4 февралдан амал қила бошлайди.
АҚШ энергия ресурсларидан ташқари барча Канада товарларига 25 фоизлик бож жорий қилди — уларга бож 10 фоизни ташкил қилади. Трюдо канадаликларни маҳаллий маҳсулотларни харид қилишга ва АҚШга эмас, ўз мамлакатида дам олишга чақирди.
Трамп Канада ва Мексикага нисбатан кучга кирадиган божларни камида 30 кунга кечиктирди. Мексика президенти Клаудия Шейнбаум америкалик ҳамкасби билан телефон орқали суҳбатлашганини ва ушу келишувга эришилганини маълум қилди.
Изоҳ (0)